Martın 6-da Qarabağ Komitəsinin iclası keçirilib. İclasda Qarabağ Azadlıq Təşkilatının sədri Akif Nağının komitənin İdarə Heyəti üzvlüyünə xitam verilib.

Eyni zamanda Vətəndaş Həmrəyliyi Partiyasının sədri, xalq şairi Sabir Rüstəmxanlı QK-ya üzv olub. Deputat Fərəc Quliyevin rəhbəri olduğu Milli Dirçəliş Hərəkatı Partiyasının Qarabağ Departamentinin sədri, partiya sədrinin müavini Şakir Ağayev iclasda iştirak edərək, növbəti toplantıda komitəyə üzv olacağını bəyan edib.

İclas barədə musavat.com-a QK-nın mətbuat xidmətinin rəhbəri Əvəz Zeynallı məlumat verib.

Barəsində verilən qərarla bağlı Akif Nağının fikirlərini aldıq. O, təəssüfləndiyini dilə gətirdi: “Açığı, belə bir qərarın qəbul ediləcəyini gözləmirdik. Çünki ortada səmimiyyət olmalıdır. Tələm-tələsik qərar qəbul edib, Akif Nağının fəaliyyətinə xitam verməklə nə qazanacaqlar? Qeyri-səmimi bir yanaşma sərgilədilər. Qaydaları pozaraq barəmdə belə qərar qəbul etdilər. Qarabağ Komitəsinin əsasnaməsində idarə heyətindən və komitədən çıxarılma ilə bağlı heç bir maddə, müddəa yoxdur. Bizim qəbul etdiyimiz əsasnamədə komitənin tərkibindən çıxarılma ilə bağlı bənddə belə deyilir ki, komitəyə üzv qəbul oluna və oradan çıxarıla bilər. Yəni orada ”kimsə iclasda iştirak etməsə çıxarılacaq" kimi söhbət yoxdur. Ən azından şifahi xəbərdarlıq olunmalı idi ki, 3 iclasda iştirak etməsən çıxarılacaqsan. Buna əməl etmədilər. Mən indiyə qədər üç iclasda iştirak etməmişəm. Bu üçüncü idi. İclasın əvvəlində bu məsələni gündəmə çıxarıb belə qərar qəbul ediblər. Bəlkə iclasın ortasına və ya axırına gəlib çatacaqdım?

Üç iclasdan sonra dördüncü iclasda bu məsələni qoya bilərdilər. Ciddi bir arqument ortaya qoymadan məni çıxarıblar. Şübhələr yaranır ki, burada sifariş və ya başqa amillər ola bilər. Dünya praktikasında belədir ki, bir şəxs haqqında qərar qəbul olunanda şəxsin özü orada mütləq iştirak etməlidir. Məsələmin müzakirəsi ilə bağlı mənə heç bir məlumat verilməyib. Ötən həftənin dördüncü günü Mirmahmud Mirəlioğlu bir heyətlə gəlmişdi ki, iclaslarda hansı səbəblərdən iştirak etmirsən. Mən də müəyyən səbəbləri demişdim. Səbəblərim aradan qaldırılandan sonra komitədə fəaliyyətimi davam etdirməyə hazır olduğumu bildirmişdim. Onlar da demişdilər ki, bu məsələni müzakirə edərik. Yəni mənə idarə heyətindən çıxarılmağımla bağlı müzakirə olacağı deyilməyib. Mənim orada iştirakım təmin olunmalı idi. İştirak etməsəm belə mənə deyilməli idi. Verdikləri qərara, sadəcə, təəssüf edirəm. Biz artıq təəccüblənmək hissini unutmuşuq. Təəssüf edirik ki, Qarabağ Komitəsinin fəaliyyəti belə bir istiqamətə yönəldi".

A.Nağı istənilən halda sıravi üzv kimi olsa belə komitədə fəaliyyətini davam etdirəcəyini söylədi: “Komitədən istefa vermək fikrim yoxdur. Sadəcə olaraq, komitənin fəaliyyətini bu cür xoşagəlməyən istiqamətdə qurduqları üçün iclaslarda iştirak etməyəcəyəm. Qarabağ Azadlıq Təşkilatının şənbə günü Ali Məclisinin iclasıdır. Bu iclas komitədə barəmdə verilən qərarla bağlı deyil. Hər üç aydan bir çağırılır.  Təbii ki, yerli şöbələr baş verənlərdən narahatdır. İclasda yəqin ki, bu məsələ qaldırılacaq. Müəyyən qərarlarımız olacaq. QAT-ın İdarə Heyətində də bu məsələ müzakirə ediləcək. Şəxsimin bu məsələ ilə bağlı mövqeyi var. Onu indidən səsləndirib Ali Məclisin və idarə heyətinin qərarına təsir etmək istəmirəm”.

QAT sədri QK-da olan partiyaların da “bostanına daş atdı: ”Ad çəkmək istəmirəm. Amma komitə rəhbərliyində olanlardan narazı qaldığımı gizlətmirəm. Orada 3-4 partiya rəhbəri var. Onların partiyasının üzvləri komitə üzvü kimi fəaliyyət göstərirlər. Həmin partiyaların rəhbərləri xüsusi canfəşanlıqla məni tərifləyərək, sonda qərarın lehinə səs verməklə işlərini gördülər. Yerdə qalanlar, yəni partiyalardan komitədə üzv olanlar rəhbərləri hansı qərarı verdisə, ona da əməl etdilər. Ümumiyyətlə, Azərbaycanda partiyalarda demokratiyanın olmadığını Qarabağ Komitəsində açıq gördüm. QAT üzvləri də komitə üzvüdürlər. Fəaliyyət göstərdiyimiz yarım il ərzində bir dəfə də şahidi olmadım ki, komitədə üzv olan partiya təmsilçisi sədrinin dediyinin əleyhinə səs versin və ya çıxsın. Bunu heç bir partiyadan görmədim. Hər kəs gördü ki, QAT daha çox demokratik prinsiplərə əməl etdi. Üzvlərimiz hətta mənim belə fikirlərimə qarşı çıxırdılar. İclasın canlı yayımında hər kəs gördü. Partiya sədrləri rəy formalaşdırdılar, barəmdə belə qərarın verilməsinə nail oldular".

Cavanşir ABBASLI,
“Yeni Müsavat”