Şair-publisist Heydər Oğuz facebook səhifəsində maraqlı şeir paylaşıb.

Ovqat.com həmin şeiri təqdim edir:

Zərbənin geriyə qayıdışı var

Hələ ki, ətrafı bürüyüb duman,

Hər şey üzə çıxar çən qurtaranda.

Allah da bəndədən əsirgər aman

İnsaf yox olanda, din qurtaranda.

Fələk döndərəndə səndən üzünü

Yaxın ətrafından gözlə özünü.

Ac toyuq-cücə də deşər gözünü

Hər səhər səpdiyin dən qurtaranda.

Kobud əllərində ağrıyır çənəm,

Qoymursan qışqıram, bağıram, dinəm,

Hələ ki, divlərin yediyi mənəm,

Sıra sənə gələr mən qurtaranda.

İşinə yarayar nə qorxu, hədə,

Zirehin canını qoruyar nə də

Vədlər fayda verməz gələndə vədə-

Qula vəd olunmuş gün qurtaranda

Heydər, hər baharın soyuq qışı var,

Hər bir dəyənəyin iki başı var.

Zərbənin geriyə qayıdışı var

Canını şüşədən cin qurtaranda.

Heydər Oğuz