Ermənistanın baş naziri Nikol Paşinyan bütün ermənilərin katolikosunun mümkün varisi kimi üstünlük verdiyi iki namizədi müəyyənləşdirib.

Oxu.Az xəbər verir ki, bu barədə "Joxovurd" qəzeti öz mənbələrinə istinadla yazıb.

Nəşrin məlumatına görə, namizədlərdən biri Erməni Apostol Kilsəsinin ABŞ-dəki qərb yeparxiyasının başçısı arxiyepiskop Ovnan Terteryan, digəri böyük Kilikiya evinin katolikosu I Aramdır. Hakimiyyət hesab edir ki, onlar ən azından vəziyyətin gedişatı aydın olana qədər sadiq qalacaqlar.

Qəzetin mənbələri bildirirlər ki, güc strukturları artıq yeparxiya başçılarını, o cümlədən yepiskoplar səviyyəsində toplantıdan sonra yayılmış bəyanatı (katolikosa qarşı - red.) imzalamış və ya imzalamamış şəxsləri tək-tək ziyarət etməyə başlayıblar.

Baş nazirin aparat rəhbəri Arayik Arutyunyan noyabrın 27-də yepiskopların bəyanatının fotosunu paylaşıb. Bəyanata əsasən, İstintaq Komitəsinin ekspertizası Eçmiədzinin dəftərxana rəisi, arxiyepiskop Arşak Xaçatryana aid edilən videonun həqiqiliyini təsdiqləyib. Sənəddə qeyd olunur ki, nəticələr katolikos II Qareginə təqdim edilib, lakin o, özü tərəfindən yaradılmış komissiyanın ekspertizasını əhəmiyyətsiz hesab edib. Bəyanatda yepiskoplar "müqəddəs Eçmiədzini" günahkar din xadimindən və onun məsuliyyətini bölüşənlərdən təmizləməyə çağırıb və katolikosun mövqeyini tənqid ediblər. Sənədi on üç yepiskopdan doqquzu imzalayıb, onların arasında arxiyepiskoplar Ovnan Terteryan, Navasard Kçoyan, Arakel Karamyan, Sion Adamyan, Vazgen Mirzaxanyan, Anuşavan Jamkoçyan, Vrtanes Abraamyan, Artak Tiqranyan və Gevorg Saroyan var. Paşinyan elə həmin gün ruhanilərlə görüşməyə hazır olduğunu bildirib.