ABŞ prezidenti Donald Tramp İsrail və Birləşmiş Ərəb Əmirliklərinin münasibətlərini "tamamilə normallaşdırmaq" üçün saziş imzaladıqlarını açıqlayıb.
 
Ovqat.com xəbər verir ki, Tramp bu qərarı "tarixi diplomatik dönüş nöqtəsi" adlandırıb.
 
Açıqlamada həmçinin İsrail və BƏƏ nümayəndə heyətlərinin önümüzdəki həftələrdə bir sıra məsələlər üzrə ikitərəfli müqavilələr imzalaması üçün bir araya gələcəyi də bildirilib.
 
BƏƏ vəliəhd şahzadəsi Məhəmməd də öz Twitter hesabında faktı təsdiqləyib.
 
"Prezident Tramp və Baş nazir Netanyahu ilə telefon danışığımızda İsrailin Fələstin ərazilərinə ilhaqını dayandırması barədə razılıq əldə olundu. BƏƏ ilə İsrail əməkdaşlıq və ikitərəfli münasibətlərin qurulması üçün bir yol xəritəsini təyin etmək barədə razılığa gəldilər", - BƏƏ şahzadəsi belə yazıb.
 
Netanyahu da İsrail və BƏƏ arasındakı normallaşma sazişini tarixi addım kimi qiymətləndirib.