Ermənistan paytaxtında növbəti etiraz aksiyası keçirilib.
Virtualaz.org yerli KİV-ə istinadən bildirir ki, “Vətənin xilası hərəkatı”nın lideri Vazgen Manukyanın təşəbbüsü ilə təşkil olunan aksiya zamanı polislə qarşıdurma yaranıb.

Vazgen Manukyan baş nazir Nikol Paşinyanın istefası ilə bağlı fevralın 20-də daha böyük mitinqin keçiriləcəyini bəyan edib. O deyib ki, Paşinyanın partiyası yayda növbədənkənar parlament seçkilərinin keçirilməsi ilə bağlı məlumat yayıb. “Lakin bu bizim üçün əsas deyil və biz mübarizəmizi sonadək davam etdirəcəyik”, – deyə Manukyan vurğulayıb.

Onun çıxışından sonra mitinq iştirakçıları bir sıra şüarlar səsləndiriblər.

Polisin intizam çağırışına etiraz edən bir qrup hüquq-mühafizə orqan əməkdaşlarına hücum edib.
Polislə qarşıdurma yaranıb və 20-yə yaxın aksiya iştirakçısı saxlanılıb.


Bildirilib ki, fevralın 20-də daha böyük və izdihamlı mitinq keçiriləcək.

**16:25
Ermənistanın paytaxtı İrəvandakı Azadlıq meydanında “Vətənin xilası hərəkatı”nın təşəbbüs ilə mitinq keçirilir. Mitinqdə hərəkatın lideri, müxalifətin baş nazir vəzifəsinə namizədi Vazgen Manukyan çıxış edib.

"Gələcək nəsillər bizə lənət oxuyacaq", - deyən Manukyan xalqı oyanmağa çağırıb.

“Oyanın, ölkənin gələcəyi ilə bağlı qərar verin. Ölkənin gələcəyini həll edən sizsiniz. Bütün milli siyasi qüvvələr sizin yanınızdadır, Gözlərimizin önündə vətənimizi itiririk".