YUXULAR, APARIN MƏNI

               Yuxular, qara buludlar üzərində aparın məni yaxın gələcəyə. O gələcəkdə başqa bir dünya olacaq, başqa bir dünya. O  gələcəkdə silahlar susacaq, insanlar dinc bir həyat yaşayacaqlar.

O gələcəkdə yalnız məhəbbət hissi ürəklərə hakim olacaq.

O gələcəkdə göy üzündə  bəmbəyaz buludlar olacaq. Durnalar sevgi nəğməsi oxuyacaq. Çiçəklər, güllər min rəngə çalacaq.

O gələcəkdə…

Yuxular, aparın, aparın məni o gələcəyə.

16.01.2025.

       BİTMƏYƏN DUYĞULAR

          Pəncərə önündə yenə dikilib qalmışam; güclü şimal-qərb  küləyinin hirs-hikkəsini həyəcanla izləyirəm. Külək   qızılgül, qarağat kollarını amansızcasına döyəcləyir, az qalır köklğündən çıxartsın.

Döyəclənən qarağat kollarının altında iki qaratoyuq dimdik-dimdiyə dayanıb bir-birinə nəsə deyir. Küləyin hirs-hikkəsi veclərinə deyil.

Evkalipt ağacı yay kimi əyilib qalxır; deyirsən bəlkə indicə tən ortasından bölünəcək.

Nərgiz gülləri soyuqdan, küləyin zərbəsindən tir-tir əsir.

Mənsə səni düşünürəm. Mənə elə gəlir ki, sən də üşüyürsən.

Elə bu an, məhz elə bu an isti, çox isti bir küləyə dönüb qızılgülləri, qarağat kollarını, tir-tir əsən nərgizləri,  bir də səni sinəmə sıxıb isitmək, istəyirəm…

 Yaman kövrəlmişəm, yaman.

                     08.02.2025.  

       TELEFON SUSUR

        Telefonla  soruşur: -Necəsən? Deyirəm: -Ağrıyıram. Deyir:

-Haran ağrıyır? Deyirəm: -Başım, ciyərim, ürəyim… Mənə

gərək olan ilacları sadalayır. -Daha sonra ?--deyə soruşur.

Onda mən yanıqlı bir ah çəkirəm, Nəsiminin qəzəlindən bu beyti ona deyirəm:

-İstərəm surəti-vəslin ta qılam dərdə dəva,

Mən sənin bimarınam, özgə dəvanı neylərəm?

Susur; telefonu söndürür.

                10.02.2025.

             DƏNİZ SƏSİ

     Dəniz səsi. Bu səsi dinləməkdən doymuram. Mənə elə gəlir ki, o səs ürəyimin çırpıntısıdır. Səsə çevrilib; deyə bilmədiklərimi deyir.

    Səsin dənizin səsinə oxşayır.

    Səsinə qulaq asmaq istəyirəm.

   18.02.2025.