İranın aprel ayındakı gündəlik neft hasilatı mart ayı ilə müqayisədə 53 min barel azalaraq, 1 milyon 969 min barelə düşüb.
 
Ovqat.com xəbər verir ki, bu barədə OPEC-in mayın 13-də yaydığı aylıq hesabatında bildirilir.
 
İranın beynəlxalq sanksiyalardan əvvəl gündəlik neft hasilatı 3 milyon 820 barel idi. Bildirilir ki, İranda neft hasilatının azalmasının səbəblərindən biri ölkə ixracatının minimuma enməsi və ölkə daxilində xam neftə olan tələbatın azalmasıdır.
 
OPEC-in yeni hesabatında bildirilir ki, bu ilin aprel ayında mart ayı ilə müqayisədə İranda neftə olan gündəlik tələbat 120 min barel azalıb. Halbuki, bir neçə ay əvvəl İranın xam neftə olan daxili tələbatı gündəlik 1.8 milyon barel təşkil edirdi.
 
OPEC-ə üzv olan 13 ölkənin aprel ayındakı neft hasilatı ümumilikdə 30 milyon 412 min barel olub. Bu rəqəm isə əvvəlki ayda, yəni mart ayında 28 milyon 614 barel idi.