Prezident İlham Əliyev iyulun 19-da Azərbaycan Respublikası Dövlət Neft Şirkətinin dörd vitse-prezidentinin vəzifələrindən azad edilməsi barədə sərəncamlar imzalayıb.
 
Ovqat.com-um məlumatına görə, Prezidentin sərəncamı ilə işindən qovulan vitse-prezidentlər bunlardır: Mikayıl İsmayılov, Bəhram Hüseynov, Tofiq Qəhrəmanov və David Məmmədov.

 
SOCAR-da isə daha 8 vitse-prezident işdən qovulma barədə Sərəncamlarını gözləyir. 
 
Qovulmayanların siyahısı




 
 
Bu vitse-prezidentlərdən əlavə, bir neçə ay bundan əvvəl SOCAR-da aparılan struktur dəyişikliyinə əsasən, qurumun idarəçiliyi Azərbaycan İnvestisiya Holdinqinə tapşırılmış və onsuz da həddindən çox olan rəhbərliyinə bir də yeni yaradılan Müşahidə Şurasının üzvləri əlavə edilmişdi. Bunlar da nə az, nə çox 7 nəfərdir.  
 

 
Beləcə, SOCAR-ın bürokratik aparatı daha da böyümüş və “gombul”luğundan yeriyə bilməz hala gəlmişdi. Hələ Müşahidə Şurası yarananda bəlli idi ki, qurumun köhnə komandası ya yarıtmaz fəaliyyətinə görə işdən qovulacaq, ya da korrupsiya əməllərinə görə həbs olunacaqlar. İlk qurbanların 4 vitse-prezident olduğunu nəzərə alsaq, böyük ehtimalla həbsə də elə onlar göndəriləcək. 
 
Simvolikdir ki, SOCAR-ın 4 vitse-prezidentinin işdən çıxarılması vaxtı tam Qurban Bayramına düşdü. Bəlkə də bununla İlahi Ədalət SOCAR-ın qurbanlarının kimlər olacağını bəribaşdan car çəkir, onun ilkin əlamətlərini göstərir. Bu mənada Prezidentin son Sərəncamını bayramda “kəsdiyi” ən iri qurbanlarından saymaq olar. Qurban təkcə danadan, qoyundan olmaz ki. Ətlik inək kimi 20-30 ildir bəslənərək “gombullaşan” SOCAR idarəçiləri bu millət üçün ən yaxşı qurbanlıqlardır. Millət Prezidentdən kadr islahatları adı altında daha yeni qurbanlar gözləyir.
 
Digər 8 vitse-prezidentin taleyini isə yəqin ki, SOCAR-da aparılacaq ciddi audit yoxlamaları müəyyənləşdirəcək. Bizdə olan məlumata görə, audit yoxlamaları artıq neçə aydır ki, davam edir.

Bəs SOCAR-ın bayram"qurbanlıqları" kimlərdir:

Modern.az saytı vəzifədən çıxarılan sabiq vitse-prezidentlərin qısa dosyesini təqdim edir:

Bəhram Bəhlul oğlu Hüseynov 1956-ci ildə Bakı şəhərində anadan olub.1983-cü ildə Azərbaycan Neft və Kimya İnstitutunu “Faydalı qazıntı yataqlarının geofiziki üsullarla axtarışı və kəşfiyyatı” ixtisası üzrə bitirib və həmin ildən Qum adası dənizdə qazma işləri idarəsində geoloq və geoloji şöbənin böyük geoloqu vəzifələrində çalışıb.

1988-ci ilin iyulundan “Xəzərdənizneftqaz” İB İstehsalat Birliyində baş ofisində Neft və qaz yataqlarının kəşfiyyatı üzrə geoloji şöbəyə böyük geoloq vəzifəsinə keçirilib, 1992-ci ildən geoloji şöbənin rəis müavini vəzifəsində çalışıb. 1993-1994-cü illərdə ABŞ-ın Amoko şirkətinin Talsa şəhərində olan elmi-tədqiqat mərkəzində ezamiyyətdə olub və birgə layihədə iştirak edib. Ezamiyyətdən qayıtdıqdan sonra Dənizdə Neft və Qazçıxarma İstehsalat Birliyində əmək fəaliyyətini işini davam etdirib. 1995-ci ilin may ayından Azərbaycan Beynəlxalq Əməliyyat Sirkətində vitse-prezidentin müşaviri vəzifəsində, 1997-ci ilin iyun ayından geoloji şöbənin böyük geologu vəzifəsində çalışıb.

1998-ci ilin iyunundan BP şirkətinin operatoru olduğu “Şahdəniz” layihəsində geolojı kəşfiyyat qrupunun rəhbəri vəzifəsinə qəbul edilib. 2000-ci ilin martından 2002-ci ilin dekabr ayına qədər BP-nin Böyük Britaniyanıin London ofisində ezamiyyətdə olmuş və “AÇG” yataqlarının II və III fazalarının işlənməsinin geologiya, geofizika və lay mühəndisliyi layihə qrupunun rəhbəri vəzifəsində çalışıb. 2002-ci ilin dekabrından 2011-ci ilin yanvarına qədər Bakıda BP-nin operatorluq etdiyi “AÇG” yatağının işlənməsi layihəsində geolojı qrupun rəhbəri, kəşfiyyat bölümündə yeni quyu planlaşdırılması (New well planning) qrupunun rəhbərı, “Azəri” yatağında hasilatın idarə olunması (Base management) qrupunun rəhbəri, “Azəri” yatağında yeni quyuların layihələndirilməsi və yerinə yetirilməsi (New well delivery) qrupunun rəhbəri vəzifələrində çalışıb.

2009-cu ildə Azərbaycan Respublikasının Prezidenti İlham Əliyevin sərəncamı ilə "Tərəqqi" medalına layiq görülüb. 2011-ci ilin yanvarından Azərbaycan Respublikası Dövlət Neft Şirkətinin Geologiya, geofizika və yataqların işlənməsi üzrə birinci vitse-prezidentinin müavini vəzifəsinə təyin olunub. Azərbaycan Respublikasının Prezidenti İlham Əliyevin 18 aprel 2016-cı il tarixli sərəncamı ilə Azərbaycan Respublikası Dövlət Neft Şirkətinin Geologiya və geofizika məsələləri üzrə vitse-prezidenti təyin edilib. İngilis və rus dillərini bilir. Yeni Azərbaycan Partiyasının üzvüdür.

***

David Niyazi oğlu Məmmədov 1955-ci ildə Kürdəmir şəhərində anadan olub. 1980-ci ildə M.Əzizbəyov adına Neft və Kimya İnstitutunu (Azərbaycan Dövlət Neft Akademiyası) “Neftin və qazın kimya texnologiyası” ixtisası üzrə bitirib. Əmək fəaliyyətinə 1976-cı ildə Vladimir İliç adına Yeni Bakı neft emalı zavodunda başlayıb. 1994-cü ilədək Yeni Bakı neft emalı zavodunun operatoru, qurğu rəisi, sex rəisinin müavini, sex rəisi, şöbə rəisi vəzifələrində işləyib. 1994-2005-ci illərdə “Azərneftyanacaq” İB-nin baş direktorunun birinci müavini-baş mühəndis, Heydər Əliyev adına Bakı neft emalı zavodunun baş mühəndisi olub.

2005-ci ildən Azərbaycan Respublikası Dövlət Neft Şirkətinin emal üzrə vitse-prezidenti təyin olunub. 2005-ci ildə “Azərbaycan Respublikasının əməkdar mühəndisi” fəxri adına layiq görülüb, 2010-cu ildə “Tərəqqi” medalı ilə təltif edilib. 
Yeni Azərbaycan Partiyasının üzvüdür.


***

Mikayıl İsmayıl oğlu İsmayılov 1964-cü ildə Ağsu rayonunun Çiyni kəndində anadan olub. 1982-ci ildə Azərbaycan Xalq Təsərrüfatı İnstitutunun (Azərbaycan Dövlət İqtisad Universiteti) mühasibat uçotu fakültəsinə daxil olub, 1983-1985-ci illərdə hərbi xidmət keçib, 1985-ci ildə ali təhsilini İ.A.Voznesenski adına Leninqrad Maliyyə-İqtisad İnstitutunun Bakı filialında davam etdirib və 1988-ci ildə həmin institutu bitirib. 2001-2004-cü illərdə Azərbaycan Respublikası Prezidenti yanında Dövlət İdarəçilik Akademiyasını fərqlənmə diplomu ilə bitirib. Mikayıl İsmayılov gənc mütəxəssis kimi əmək fəaliyyətinə Neft Daşlarında başlayıb, 1988-2003-cü illər ərzində neft-qaz sənayesində müxtəlif vəzifələrdə (mühasib, baş mühasib müavini, baş mühasib və s.) çalışıb. Əmək fəaliyyətinin böyük bir hissəsi Heydər Əliyev adına Bakı Neft Emalı Zavodu ilə bağlı olub. M.İsmayılov 2003 -2005-ci illərdə bu müəssisədə iqtisadiyyat və təchizat üzrə direktor müavini vəzifəsində çalışıb. 2005-ci ildən Azərbaycan Respublikası Dövlət Neft Şirkətinin vitse-prezidenti vəzifəsinə təyin olunub. 
Yeni Azərbaycan Partiyasının üzvüdür.
***

Tofiq Ridvan oğlu Qəhrəmanov 1953-ci ildə Bakı şəhərində anadan olub. 1976-cı ildə M.Əzizbəyov adına Azərbaycan neft və kimya institutunu (Azərbaycan Dövlət Neft Akademiyası) mühəndis-elektrik ixtisası üzrə bitirib. 1976-1983-cü illərdə Vladimir İliç adına Yeni Bakı Neftayırma Zavodunun (indiki Heydər Əliyev adına Bakı Neft Emalı Zavodu) İnformasiya-hesablama mərkəzində mühəndis vəzifəsində işləyib, zavodun komsomol komitəsinin katibi olub. 1983-1990-cı illərdə keçmiş partiya təşkilatlarında - əvvəlcə Nizami rayon Partiya Komitəsində, sonra Bakı şəhər Partiya Komitəsində təlimatçı vəzifələrində çalışıb. 1990-1991-ci illərdə Vladimir İliç adına Yeni - Bakı Neftayırma Zavodunda direktor müavini, 1991-1993-cü illərdə zavodun təsis etdiyi “Azinteroil” Birgə Müəssisəsinin Baş direktoru işləyib, 1994-1998-ci illərdə isə özəl bizneslə məşğul olub. 1998-2006-ci illərdə “Azərneftyanacaq” İB-də texniki-iqtisadi şöbənin, Heydər Əliyev adına Bakı Neft Emalı Zavodunda iqtisadi əməliyyatlar və investisiyalar şöbəsinin rəisi vəzifələrində çalışıb. 2006-2007-ci illərdə Azərbaycan Respublikası Dövlət Neft Şirkətinin Emalın strateji inkişafı şöbəsinin rəisi, 2007-2010-cu illər ərzində isə Marketinq və İqtisadi Əməliyyatlar İdarəsinin rəisi olub. 2010-cu ildən Azərbaycan Respublikası Dövlət Neft Şirkətinin Strateji inkişaf üzrə vitse-prezidentidir. 2010-cu ildə Prezident İlham Əliyevin Sərəncamı ilə “Əməkdar mühəndis” fəxri adına layiq görülüb.

Yeni Azərbaycan Partiyasının üzvüdür.