Gürcüstanın keçmiş prezidenti Mixail Saakaşvili yerli özünüidarə orqanlarına seçkilərə müdaxilə etməmək üçün planlaşdırıldığı vaxtdan əvvəl vətəninə qayıdıb.
 
Ovqat.com xəbər verir ki, Gürcüstanın Vahid Milli Hərəkat partiyasının üzvü Eka Xerxeulidze Saakaşvilinin Gürcüstana erkən qayıdışını şərh edərkən belə deyib.
 
Saakaşvili daha əvvəl seçki günü, oktyabrın 2-də Kiyev-Tbilisi reysi ilə Gürcüstana gələcəyini bəyan etmişdi. Bunu təsdiqləmək üşün isə təyyarəyə aldığı biletin şəkilini çəkərək sosial şəbəkələrdə yaymışdı. Bu gün isə o, artıq Gürcüstanda olduğunu Batumidə çəkdiyi video-kadrlarla duyurmuşdu. Eks-spiker facebook səhifəsində paylaşdığı video-görüntüdə bütün gürcü xalqını salamlayaraq, artıq evdə olduğunu bildirmişdi. Gürcüstan hakimiyyəti isə bu xəbəri saxta adlandıraraq Saakaşvilinin Gürcüstanda olmadığını iddia edir.
 
Saakaşvilini dəstəkləyən Vahid Milli Hərəkat partiyası liderlərinin geri döndüyünü təsdiqləyib. Partiyanın sözçüsü Eka Xerxeulidze Saakaşvilinin qayıdış planını niyə dəyişdiyi barədə deyib:
 
"Planlarının niyə dəyişdiyini bilmirəm. Sadəcə onu deyə bilirəm ki, heç bir şey seçkilərin keçirilməsinə mane olmamalıdır. Yəqin ki, bunu nəzərə alıb. Çünki bilirsiniz ki, komissiyaların işi gec saatlara qədər davam edir. Və anlaşılmazlıqların qarşısını almaq üçün bu suallar aradan qaldırıldı. Nümayəndələrimiz və bütün müxalifət partiyalarının nümayəndələri məntəqələrdə sakit işləməlidirlər - əsas məsələ budur. Və qələbə rəsmiləşdirilməlidir”.
 
Oktyabrın 2 -dən əvvəl Saakaşvilinin ictimaiyyət qarşısına çıxıb -çıxmayacağı ilə bağlı suala Herzeulidze belə cavab verdi: “Mixail Saakaşvilini proqnozlaşdırmaq çox çətindir. Bilmirəm, deyə bilmərəm”.
 
Gürcüstan rəsmi dairələri Saakaşvilinin ölkəyə qayıtdığını inkar etsələr də, Ukrayna qaynaqları Saakaşvilinin artıq öz məmləkətində olduğunu bildirirlər.
 
Saakaşvilinin Kiyevdəki ofisinin əməkdaşı Maria Barabaş “Mtavari” telekanalına verdiyi müsahibədə gürcü liderin bir gün əvvəl Kiyevi tərk etdiyini söyləyib.
 
Xatırladaq ki, bələdiyyə seçkilərindən əvvəl Gürcüstana gedəcəyini bildirən Saakaşvili həbsdən qorxmadığını demişdi. Hazırkı hökumət isə eks-prezidentin "Gürcüstan torpağına ayaq basacağı" dəqiqə həbs ediləcəyi barədə ona xəbərdarlıq etmişdi.
 
Saakaşvili 2004-2013-cü illərdə Gürcüstana rəhbərlik edib. 2013 -cü ildə başqa bir seçkidə məğlub olduqdan sonra ölkəni ayrılıb. Bundan sonra siyasətçiyə qarşı bir sıra cinayət işləri açılıb, bəzilərində qiyabi olaraq həbs cəzasına məhkum olunub. 2015 -ci ildə Gürcüstan vətəndaşlığından çıxarılan Saakaşvili təxminən 6 ildir Ukrayna vətəndaşıdır.