Dekabrın 27-də saat 15.30 radələrində Azərbaycanın Xocavənd rayonunun Ağdam (Akaku) kəndi istiqamətində qanunsuz erməni silahlı qrupunun və ya ərazidə qalmış Ermənistan silahlı qüvvələrinin qalıqlarından ibarət 6 nəfərlik dəstənin Azərbaycan Ordusunun bölmələrinə hücum etdiyi rəsmən təsdiqlənib.
 
Ovqat.com xəbər verir ki, Azərbaycan Müdafiə Nazirliyinin   yaydığı məlumata görə, hücum nəticəsində bir nəfər hərbi qulluqçumuz, əsgər Qənbərov Elmir Rayil oğlu şəhid olub, əsgər Əliyev Emin Süleyman oğlu isə yaralanıb. İlkin tibbi yardım göstərildikdən sonra yaralı hərbi qulluqçumuz tibb müəssisəsinə təxliyə edilib, həyatı üçün heç bir təhlükə yoxdur.
 
Görülən tədbirlər nəticəsində qanunsuz erməni hərbi dəstəsinin altı üzvü məhv edilib.
 
Bu kimi hal təkrarlanarsa, Azərbaycan Ordusu tərəfindən qəti tədbirlər görüləcəkdir", - nazirlikdən bildirilib.
 
Müdafiə Nazirliyinin rəhbərliyi şəhidin ailəsinə dərin hüznlə başsağlığı verir və səbr diləyir.
 
Allah rəhmət eləsin!
 
Qeyd edək ki, dünən yayılan bu xəbəri Ermənistan Müdafiə Nazirliyi təkzib etmişdi. İndisə məlum olub ki, Vətən müharibəsində yalanları ilə məşhurlaşan Ermənistan Müdafiə Nazirliyi yenə öz ənənəsini davam etdirməkdə israrlıdır.