Ermənistan silahlı qüvvələrinin bölmələri Ermənistan-Azərbaycan dövlət sərhədinin Kəlbəcər rayonu sahəsində təxribat törətməyə davam edir.

Ovqat.com-a Müdafiə Nazirliyindən verilən məlumatda belə deyilir.

Məlumata görə, iyulun 28-i saat 00:50 radələrindən başlayaraq Ermənistan silahlı qüvvələrinin bölmələri Basarkeçər rayonu ərazisindəki müxtəlif istiqamətlərdə yerləşən döyüş mövqelərindən Azərbaycan Ordusunun Kəlbəcər rayonu ərazisindəki mövqelərini atıcı silahlar və qumbaraatanlardan növbəti dəfə intensiv atəşə tutub. 

Qarşı tərəfdən açılan atəş nəticəsində iki hərbi qulluqçumuz — Əliyev Sadiq Nizami oğlu və İmranlı İmran Dilqəm oğlu yaralanıb. Yaralılara ilkin tibbi yardım göstərilib, onların həyatları üçün təhlükə yoxdur.

Azərbaycan Ordusunun bu istiqamətdə yerləşən bölmələri tərəfindən adekvat cavab tədbirləri görülür.

Bir daha qeyd edirik ki, iki ölkənin dövlət sərhədi boyunca gərginliyin artırılmasına görə bütün məsuliyyət tam şəkildə Ermənistanın üzərinə düşür.

Ermənistan Müdafiə Nazirliyi də atışmalar barədə rəsmi məlumat yayıb.

Məlumata görə, saat 03:40-da və 06:00-da sərhədin şimal-şərq istiqamətində Azərbaycan Ordusu tərəfindən erməni mövqeləri atəşə tutulub, hal-hazırda da atışmalar davam edir.

Nazirlik bildirib ki, erməni tərəfi bu atışmada itkilər verib. İtkilərin miqdarı və mahiyyəti hələlik açıqlanmayıb.