Ermənistanda axtarışda olan keçmiş prezident Serj Sərkisyanın qardaşı oğlu Narek Sərkisyan Çexiyadan İrəvana gətirilib.

Teleqraf.com xəbər verir ki, bu barədə Ermənistan polisinin mətbuat xidməti şənbə günü məlumat yayıb.

Narek Sərkisyana silah, narkotik saxlamaq və dələduzluq maddəsi ilə cinayət işi açılmış və barəsində axtarış elan edilmişdi. O, həmçinin, adam oğurluğu maddəsi ilə də ittiham olunur. Bundan əvvəl Narek Sərkisyanın Praqada saxta Qvatemala pasportu ilə tapıldığı bildirilmişdi. Praqa məhkəməsi və Çexiya Ədliyyə Nazirliyi onun Ermənistana təhvil verilməsi barədə razılığa gəliblər.

“Sərkisyan dekabrın 21-də Ermənistan polisinin müşayiəti ilə Ermənistana gətirilib”, – deyə Ermənistan polisinin “Feysbuk” səhifəsində bildirilib.