Rusiyanın əks tədbirləri səbəbindən Donbassdakı Ukrayna Silahlı Qüvvələrinə məxsus təxminən 200 tank hücuma keçmək imkanını itirib.
 
Ovqat.com xəbər verir ki, məlumatı “Bulgarian Military” nəşri yayıb. 
 
Nəşrin iddialarına görə, Rusiyanın Ukrayna tanklarını hərəkətsiz hala gətirməsi çox asan yolla mümkün olub. Son aylarda Rusiya Ukraynaya neft məhsulları tədarükünü azaldıb. Ukrayna tankları da yanacaq tapa bilmədiklərindən “əlil” vəziyyətinə düşüblər.
 
 
Rusiyanın Avia.pro nəşri də  bu xəbəri təsdiqləyir və bu problemin bir ay ərzində davamı Ukrayna ordusunu hərbi texnikadan məhrum edəcəyini bildirir.



Ən acınacaqlı hal odur ki, NATO qüvvələrinin gen boğazdan dəstəklədiyi Ukrayna Silahlı Qüvvələri hərbi texnikaların sayı baxımından da separatçı Donbassdan geri qalır. Bildirilir ki, Ukraynanın Donbassda ən azı 450 tankı var, ancaq bunların yalnız yarısı döyüşə hazır vəziyyətdədir. Separatçı LDNR birləşmiş qüvvələrinin isə 650 tankı mövcuddur. Bolqarıstanın hərbi nəşri vurğulayır ki, tanınmayan respublikalarda bu qədər sayda tankın meydana çıxması ilə bağlı çoxlu sual var.
 
Amma “Bulgarian Military” nəşrinin bu suallar ətrafında baş sındırıb üzülməsi də yersizdir. Ona qalsa, “DQR”-də də çox sayda tank vardı. Azərbaycan ordusu o tanklardan 366-nı ya məhv edib, ya da hərbi qənimət kimi “diri” ələ keçirdi. Bundan əlavə, zərərsizləşdirilən və ələ keçirilən döyüş makinaları arasında 125 artilleriya topu, 7 “S-300” zenit-raket kompleksi, 50-dən çox digər zenit-raket kompleksləri, 522 yük avtomaşını və digər texnikalar da vardı.