Donbassdakı rus separatçıları artilleriya zərbəsi ilə Ukraynaya məxsus hərbi bazanı vurublar.
 
Ovqat.com xəbər verir ki, separatçıların yaydığı məlumata görə, zərbə nəticəsində hərbi bazanın bir sıra texnikası və silah-sursatı sıradan çıxarılıb. 
 
Bildirilir ki, Ukrayna Silahlı Qüvvələrinin 25 -ci Hava -Dəniz Briqadasının qüvvələri həmin hərbi bazada yerləşirmiş.
 
Separatçılar Ukrayna Silahlı Qüvvələrinin yeni Ali Baş Komandanı təyin ediləndən bəri Donbassda vəziyyətin mürəkkəbləşdiyini, tez-tez hücuma məruz qaldıqlarını, dünənki artilleriya zərbəsinin də bu hücumlara cavab olduğunu vurğulayıblar.
 
Dünən separatçıların hücumuna məruz qaldıqlarını Ukrayna Silahlı Qüvvələri də təsdiqləyib. USQ-nin rəsmi məlumatına görə, hücumda iki Ukrayna əsgəri yaralanıb, ölən olmayıb.


 
“Ukrayna ordusu cavab atəşı açıb və Birgə Qüvvələr əməliyyat bölgəsindəki vəziyyəti izləyirlər”, - bildirən USQ-ya görə avqustun 28 -də Ukrayna mövqelərinin müxtəlif istiqamətlərdə atəşə tutulması nəticəsində 8 əsgər yaralanıb.
 
Xatırladaq ki, ötən ayın 28-də Ukrayna Silahlı Qüvvələrinin sabiq Baş Qərargah rəisi Ruslan Xomçak vəzifədən uzaqlaşdırılmış, yerinə Valeri Zalujnı gətirilmişdi. O zamana qədər Zalujnı ordunun “Şimal” korpusuna rəhbərlik edirdi.
 
Ovqat.com