Novator.az bildirir ki, Viktor Yanukoviç 1950-ci il iyulun 9-da Donetsk vilayətində doğulub. 1980-ci ildə Donetsk Politexnik İnstitutunu mühəndis-mexanik ixtisası, 2001-ci ildə Ukrayna Xarici Ticarət Akademiyasını beynəlxalq hüquq ixtisası ilə bitirib.

İqtisad elmləri doktoru, professordur.

1997-2002-ci illərdə Donetsk Vilayəti Dövlət Administrasiyasının sədri, 2002-2005 və 2006-2007-ci illərdə Ukraynanın baş naziri olub.

2003-cü ildən Regionlar Partiyasına sədrlik edib.

2010-cu i fevralın 7-də prezident seçilib, fevralın 25-də səlahiyyətlərinin icrasına başlayıb.

2013-cü ilin noyabr ayında Viktor Yanukoviç Ukraynanın Avropa İttifaqı ilə yaxınlaşmaq kursundan çəkilərək Rusiya ilə sıx işbirliyinə cəhd göstərib. Bundan sonra ölkədə inqilabi proseslər başlayıb. 2014-cü il fevralın 22-də parlament Viktor Yanukoviçi prezident postundan uzaqlaşdırıb və o, ölkədən qaçaraq Rusiyaya sığınıb, dövlət başçısı səlahiyyətləri parlament sədri Aleksandr Turçinova ötürülüb, mayın 25-də keçirilmiş növbədənkənar seçkidə Pyotr Poroşenko prezident seçilib.

2019-cu ildən Vladimir Zelenski prezidentdir.

Ukraynada Viktor Yanukoviç sabiq prezident statusundan məhrum edilib və onun haqqında cinayət işləri qaldırılıb.

2014-cü ildə Viktor Yanukoviç hakimiyyətdən düşən kimi Rusiya Ukraynanın Krım yarımadasını zəbt edərək özünə birləşdirib, həmçinin Donbas bölgəsində iki separatçı rejim – “Donetsk Xalq Respublikası” və “Luqansk Xalq Respublikası” qurub.

2022-ci il fevralın 21-də Rusiya “Donetsk Xalq Respublikası” və “Luqansk Xalq Respublikası”nı müstəqil dövlətlər kimi tanıyıb, hər iki rejimlə dostluq və qarşılıqlı yardım haqqında müqavilələr imzalayıb. Fevralın 24-də isə Rusiya prezidenti Vladimir Putin Ukraynada hərbi əməliyyatlara əmr verib. Həmin gündən Ukrayna torpağında qanlı döyüşlər gedir.