Donbas Rusiyanın 2014-cü ildə Ukraynanı işğal etməsindən sonra ən çox zərər çəkmiş bölgə olaraq qalır. Bir çox şəhərlər dağıdılıb və təkcə Mariupolda, Volodimir Zelenskiyə görə, Rusiyanın zərbələri ən azı 20 min dinc sakinin ölümünə səbəb olub.

Musavat.com xəbər verir ki, bu barədə “The Times” yazır.

Nəşrin məlumatına görə, ABŞ prezidenti Donald Tramp Milad bayramına qədər atəşkəsə nail olmağa çalışır və Kiyevə təzyiq edərək, bütün Donbasın Moskvaya təhvil verilməsini təklif edir. Bununla belə, Kreml bildirir ki, Ukrayna Kramatorsk, Sloviansk və digər möhkəmləndirilmiş şəhərlərdən qoşunlarını çıxarmayana qədər hücumu dayandırmayacaq.

Ukrayna Konstitusiyasına görə, ərazinin verilməsi yalnız referendum yolu ilə mümkündür, müharibə zamanı bunu keçirmək faktiki olaraq mümkün deyil. Kiyev nəzəri cəhətdən Rusiya hakimiyyətini tanımadan qoşunlarını geri çəkə bilər, lakin analitik Nikolay Beleskovun fikrincə, bəzi qoşunlar geri çəkilmə əmrini yerinə yetirməkdən imtina edə bilər. O vurğulayır ki, bu cür güzəştlər “milli rüsvayçılıq qoxusu verir” və ölkənin birliyinə təhlükə yaradır.

Rusiya ordusu demək olar ki, bütün Luqansk vilayətinə və Donetskin 80%-dən çoxuna nəzarət edir. Putin bütün Donbası ələ keçirməkdə israr edir, lakin Beleskovun qeyd etdiyi kimi, böyük şəhərlər uğrunda döyüşmək Rusiyaya on minlərlə insanın həyatına başa gələcək. “Döyüşsüz geri çəkilmək siyasi baxımdan çətin və hərbi baxımdan təhlükəlidir”, - ekspert deyir.

“The Times”ın mənbələri hesab edir ki, hətta Kiyevin güzəştləri sülhə gətirib çıxarmayacaq. Kreml təkcə ərazi deyil, həm də Kiyevdəki “qərbyönlü hökumətin” devrilməsini və Ukraynanın NATO-ya üzvlüyünün qarşısını almağı hədəfləyir.

Vəziyyət Kiyevdəki daxili böhranla mürəkkəbləşib. Andrey Yermakın istefası Zelenskinin mövqeyini sarsıtdı, lakin müşahidəçilər bunun ABŞ-Ukrayna danışıqlarına təsir etmədiyini qeyd edirlər. ABŞ-ın planına 100 gün ərzində prezident seçkilərinin keçirilməsi də daxildir. Tramp Ukraynanın “artıq demokratiya olmadığını” iddia edir, lakin Zelenski beynəlxalq təhlükəsizlik yardımı göstərildiyi təqdirdə seçkilərə hazır olduğunu bəyan edib.

Eyni zamanda, Rusiyanın keçmiş baş naziri Mixail Kasyanovun fikrincə, Putin Donbas üzərində nəzarətin tanınmasına, ilk növbədə, “özünə və hökumətinə hörmətini” saxlamaq istəyindən irəli gəlir. Nəşr vurğulayır ki, ərazinin belə verilməsi Rusiyanın işğalını dayandıra bilməyəcək.