Xəbər lenti


  Yağış gəl

Yandığımız, bişdiyimiz bəsdi, bəs,

Buxarlanıb uçduğumuz bəsdi, bəs.

Haldan-hala düşdüyümüz bəsdi,bəs,

Dözəmmirik,yağış,gəl, ay yağış,gəl,

Yaxınlardan,uzaqlardan yığış gəl.

...Dəli-dolu gəlməyəsən gələndə,

Leysan olub gəlməyəsən,gələndə.

Araz yolu gəlməyəsən gələndə.

Bu cızdağa, bu cız-bıza naxış gəl,

Hardasansa, yığış gəl e...yığış gəl.

Bir az sərin,bir az soyuq səpələn,

Bu dəm verən şəhər boyu səpələn.

Sən Allahın,soyut göyü,səpələn,

Sel olma ha...Damla-damla axış gəl,

Axır ki gəl, yığış gəl e,yığış gəl.

Canımıza əldə bıçaq çatıbdı,

Qovruğa tək töküb saca, çatıbdı.

Çünəş baba bizdən ocaq çatıbdı,

Toparlan da, dərə,təpə, yoxuş,gəl,

Bu yollardan yığış gəl eee,yığış gəl...

Üzün dərin-dərin

Fikrə dalmış

Qırışlarına gülümsəmək

Şair işidir.

Gözlərinin altı 

Şiş gətirən ömrün

Qərib məzara yürüşünə

Şam tutmaq

Şair işidir.

İşığın çırağına

Yağ olub dammaq

Şair işidir.

Həsrətinin

Əli qoynunda

"Öz cənazəsinə gir"məyə

Ərki çatmaq

Şair işidir.

 

Ana dili gününə gecikmiş mesaj:

/ixtisarla/

...Dilimin canında - söz şirinliyi,

Məni aöz düzündə yaşatdı dilim.

Dilimin varlığı - öz diriliyim,

Düşmənə söz ilə daş atdı dilim.

Dilim güvəncimdi, əlim yalınsa,

Dilini yaşadan xalq ölə bilməz.

Qadağa qoyulsa, dönər qılınca,

Dil ağa tanımaz, dil kölə bilməz...

 ...

Körpəlik -

ömrün əlində qoğal,

ovcuna sıxılan

nar şirəsi,

yanağına, dodağına çəkilən

çəhrayı,

alma sevinci,

şəftəli ətri.

Körpəlik -

lampa işığı.

Bu işıqda 

hər şey aydındır,

hər şey qaranlıq.

Körpəlik -

bütün səhvlərin

sıfıra vurulması,

kölgəsi olmayan

kədər,

kədəri olmayan

itki...




Ana səhifəyə qayıt        Baxış: 2 095          Tarix: 20-08-2023, 10:50      

Xəbəri paylaş


Paylaş:   

Prizma