Kremlinin bundan sonrakı addımı nə olacaq?

Rusiyanın Ermənistandakı səfiri Sergey Kopırkin məsləhətləşmələr üçün Moskvaya çağırması ətrafında müzakirələr davam edir.

“Bu, təbii ki, Nikol Paşinyan və Ermənistan rəhbərliyinin bəzi digər nümayəndələrinin bir sıra qeyri-dost bəyanatları və hərəkətləri ilə bağlı diplomatik demarşdır. Amma bütövlükdə bu, Rusiya-Ermənistan münasibətləri üçün hələ kritik vəziyyət deyil, baxmayaraq ki, bu, münasibətlərdə sistemli böhran olduğunu nümayiş etdirir”. Musavat.com xəbər verir ki, bu barədə “ Vzqlyad” nəşr yazır.

“Mariya Zaxarovanın Xarici İşlər Nazirliyinin rəsmi saytında rəsmi şərhdə deyilir ki, səfir Sergey Kopırkinin “məsləhətləşmələr üçün Moskvaya çağırılıb”. “Geri çağırma” ilə “məsləhətləşməyə çağırış” arasında ciddi fərq var. Birincisi diplomatik münasibətlərin statusunun aşağı salınmasını, daha sonra isə müvəqqəti işlər vəkilinin təyin edilməsi və diplomatik münasibətlərin pozulmasına aparır. “Məsləhətləşmələrə çağırış” diplomatik demarşdır, lakin müvəqqəti və tez-tez baş verir və bu, ölkələr arasında münasibətlərin statusunu və xarakterini aşağı salmaq demək deyil. Bu, qismən səfirliyin yerləşdiyi ölkədəki bəzi neqativ hallara ölkənin münasibətini nümayiş etdirmək formasıdır” deyə, məqalədə bildirilir. Ermənistan Xarici İşlər Nazirliyi də öz növbəsində bildirib ki, bu, Rusiyanın qərarıdır və buna münasibət bildirmirlər.

Rusiya nəşri yazır ki, bu cür diplomatik gedişlərin hər zaman özünəməxsus səbəbi olur: “Amma praktikada səfiri məsləhətləşmələrə çağırmaq bütün hadisələrin nəticəsi ola bilər. Bu, faktlardan daha çox tendensiyaya reaksiyadır. İndi bu, Paşinyanın parlamentdə 2020-ci il müharibəsi zamanı guya KTMT-yə üzv olan bəzi iki ölkənin Azərbaycana kömək etdiyi barədə bəyanatları ilə bağlıdır. Başqa bir səbəb də odur ki, Paşinyan Ermənistanı KTMT-dən çıxmağa sürüklədiyi heç kimə sirr deyil. İrəvan başa düşür ki, Rusiya ilə münasibətlərdə kəskin addımlar Ermənistan daxilində yumşaq desək, ciddi gərginliklərə gətirib çıxaracaq”.

O da bildirilir ki, səfir Kopırkinin Moskvaya çağırılması təkcə Rusiyanın Nikol Paşinyanın ayrı-ayrı bəyanatlarına mənfi münasibətinin nümayişi deyil, həm Rusiya-Ermənistan münasibətlərində, həm də Ermənistanın özündə son dərəcə mənfi ümumi tendensiyaya etirazdır: “Rusiya Ermənistanın daxili işlərinə qarışmır. Amma onun öz mövqeyini və fikrini rəsmi İrəvana nümayiş etdirmək üçün diplomatik üsulları və rıçaqları var. Səfirin geri çağırılmasından, Ermənistanla münasibətlərin kəsilməsindən hələ söhbət belə getmir, ancaq Rusiyanın mövqeyini bu şəkildə göstərmək lazım idi”.

Musavat.com