Qlobal istiləşmə və torpaqların kənd təsərrüfatı üçün həddindən artıq istifadəsi yalnız təbiəti deyil, həmçinin insanların ərzaq ehtiyatlarını da məhv edəcək.

Ovqat.com xəbər verir ki, alimlərin tədqiqatına görə, kartof, qəhvə və kakao 2055-ci ilə qədər yox ola bilər.

Bioloji müxtəliflik mövzusunda araşdırmalar aparan "Bioversity International" adlı mütəxəssislər qrupu tərəfindən dərc olunan məruzədə qlobal istiləşmə, xəstəliklər və kübrələr səbəbiylə yalnız vəhşi təbiətin deyil, insanların əsas qida ehtiyatlarının da təhlükə altında olduğu bildirilir. Alimlər bunu "6-cı nəsil kütləvi tükənmə" adlandırırlar.

Məruzəyə görə, 940 bitki və heyvan növü tükənmək təhlükəsi qarşısındadır.

Qeyd edilir ki, 12 bitki və 5 heyvan növü dünya əhalisinin əsas qida mənbələrinin üçdə ikisini təşkil edir. Araşdırmaya görə, qəhvə, kakao və kartofun istehsalı getdikcə çətinləşə, hətta bunların istehsalı qeyri-mümkün ola bilər. 2055-ci ildə kartof növlərinin 22 faizinin yox olacağı təxmin edilir. Dünya şokalad istehsalı üçün lazım olan kakaonun 70 faizini təmin edən Qana və Kot-Divuar kimi ölkələrdə iqlim dəyişikliyi ilə əlaqədar 40 il sonra tək bir kakao ağacı belə qalmaya bilər. (publika.az)