İllərdir qarşılıqlı ittihamlar və sanksiyalar nəticəsində böhran yaşanan Türkiyə-İsrail münasibətlərində son vaxtlar müsbət meyllər baş verir. Belə ki, ötən il Türkiyə və İsrailin XİN rəsmiləri arasında 13 ildən sonra ilk dəfə baş tutan telefon danışığı iki ölkənin münasibətləri normallaşdırmaqda maraqlı olduqlarını göstərdi. Bu hadisədən sonra artıq qarşılıqlı ittihamların yerini dövlət rəsmilərinin müsbət bəyanatları əvəz etməyə başladı.Mövzuyla bağlı “Orta doğu” Araşdırmalar Mərkəzinin rəhbəri, siyasi şərhçi Sədrəddin Soltan “AzPolitika.info”-ya şərhində bildirib ki, 10 ildən artıqdır davam edən Türkiyə-İsrail münasibətlərindəki gərginlik 2016-cı ildən tərəflərin diplomatik əlaqələri bərpa etməsilə normallaşmağa başlayıb: “Həmin il tərəflər qarşılıqlı olaraq səfirlər təyin etdilər. Buna qədərki müddət ərzində diplomatik münasibətlər dayandırılsa da, ölkələr arasında ticarət, turizm, iqtisadi və sosial sahədə əməkdaşlıq davam etdi. Hazırda münasibətlərin inkişafı üçün yeni bir fürsət yaranıb. İsraildə hakimiyyətə yeni qüvvələr gəlib. Görünən odur ki, bu qüvvələr Türkiyə ilə münasibətlərin normallaşmasında maraqlıdırlar. Düzdür, İsrail Prezidentinin hökumətə və ölkədə gedən siyasi proseslərə ciddi müdaxiləsi olmasa da, hər halda dünya yəhudilərinin prezidenti olaraq onun Türkiyəyə səfər etməsi simvolik də olsa alqışlanası bir hərəkətdir”.