Avropa Komissiyasında 2 gün davam edən "süni intellekt qanunu" danışıqları dünən "tarixi razılaşma" ilə nəticələnib. Təxminən 37 saat davam edən çətin danışıqlardan sonra Avropa Birliyi ölkələri süni intellektdən sui-istifadə hallarının qarşısını almaq üçün “dünyada ilk hərtərəfli süni intellekt qanunu”nu qəbul ediblər.

Avropa İttifaqının qanunvericiləri dünyanın ilk böyük hərtərəfli süni intellekt qanunlarından birini qəbul edən razılaşma əldə ediblər.

Musavat.com xəbər verir ki, “Süni İntellekt Aktı” adlanan əlamətdar qanun sürətlə inkişaf edən texnologiya ilə bağlı riskləri həll edir. Qanun “insanların təhlükəsizliyinə, yaşayış vasitələrinə və hüquqlarına açıq-aşkar təhlükə yaratdığı hesab edilən” zərərli süni intellekt tətbiqlərini qadağan edir.

Süni intellektin mümkün təhlükələri ilə bağlı qorxuların artdığı bir vaxtda gələn qanunla ilk dəfə olaraq bir “qayda kitabı” təyin olunub.

Qanuna əsasən, ChatGPT kimi çatbotlar və ya şəkil, audio, video məzmun istehsal edən texnologiyalar “şəffaflıq öhdəlikləri”nə tabe olacaq. İnsanlar texnologiyadan sui-istifadədən şikayət etmək hüququna malik olacaq və pozuntular aşkar edilərsə, cərimələr tətbiq ediləcək.

Bundan əlavə, böyük cinayətlər istisna olmaqla, süni intellekt hüquq-mühafizə orqanları tərəfindən istifadə edilməyəcək. Polis bu texnologiyadan yalnız insan alveri, cinsi cinayətlərin qurbanlarının müəyyən edilməsi, terror, qətl və silahlı soyğunçuluq kimi ağır cinayətlərdə iştirak edən şübhəlilərin biometrik müşahidəsi üçün istifadə edə biləcək.

Avropa Komissiyası tərəfindən qəbul edilən yüzlərlə səhifəlik hüquqi mətn yenidən tərtib edilərək Avropa Parlamentinə göndəriləcək. Parlamentin 2024-cü ildə mətnə səs verəcəyi gözlənilir. Qanun 2025-ci ildə qüvvəyə minəcək.