“Zeytun Budağı” əməliyyatına qarşı YPG/PKK-yə dəstək vermək məqsədilə Afrinə girməyə çalışan Əsədə bağlı könüllü qruplar Türk artilleriyasının atəşi altında bölgədən geri çəkilib.

 Ovqat.com Türkiyə mətbuatına istinadən xəbər verir ki, hadisə bu axşam Bakı vaxtı ilə 18 radələrində baş verib.

Bildirildiyinə görə, Hələb istiqamətindən hərəkət edən könüllülərdən ibarət maşın karvanı Afrinin mərkəzinə 10 km qalmış Türkiyə topunun atəşiylə üzləşib. Top atəşləri xəbərdarlıq xarakterli olub və maşınların yan-yörəsinə düşüb. Könüllülər xəbərdarlığın ciddi olduğunu anlayıb geri qayıdıblar.

Qeyd edək ki, dünən Suriya ordusunun Afrinə girəcəyi xəbəri yayılanda Türkiyə rəsmiləri onları vuracaqlarını açıq şəkildə bəyan etmişdilər.