Dekabrın 5-də “Naxçıvan” Universitetinin rektoru vəzifəsinə təyin edilən Nurlana Əliyeva ali məktəbin kollektivinə təqdim olunub.

Ovqat.com xəbər verir ki, yeni rektoru kollektivə Naxçıvan Muxtar Respublikası Ali Məclisi Sədrinin köməkçisi və oğlu Seymur Talıbov təqdim edib.

Məlumata görə, bu münasibətlə universitetdə keçirilən tədbirdə Seymur Talıbov bildirib ki, muxtar respublikada bütün sahələrin inkişafı diqqət mərkəzindədir: “Təhsilin inkişafına göstərilən böyük diqqət və qayğının nəticəsidir ki, bu sahədə qazanılan uğurlar ildən-ilə artır. Təhsil müəssisələri üçün yeni binalar tikilir, ümumtəhsil məktəbləri ən müasir informasiya və kommunikasiya texnologiyaları ilə təmin edilir. Bu tədbirlər paytaxt şəhərimiz Naxçıvandan tutmuş ən ucqar dağ və sərhəd kəndlərini əhatə edir”.

Ali təhsil müəssisələrinə göstərilən diqqət və qayğıdan ətraflı danışan Seymur Talıbov əminliyini bildirib ki, bundan sonra da Naxçıvan Universiteti həmişə olduğu kimi qabaqcıl təhsil müəssisələri sırasında öz layiqli yerini tutacaq.

Yeni təyin olunan rektor Nurlana Əliyevanı universitet kollektivinə  təqdim edən Seymur Talıbov  ona gələcək fəaliyyətində uğurlar arzulayıb.

Naxçıvan Universitetinin prorektoru Hüseyn Bağırsoylu çıxış edərək yeni rektor barədə tədbir iştirakçılarına geniş məlumat verib. Onun bildirdiyinə görə, Nurlana Sabir qızı Əliyeva 1977–ci ildə Naxçıvan şəhərində anadan olub. 1993-1997–ci illərdə Naxçıvan Dövlət Universitetində Filologiya ixtisası üzrə bakalavr təhsili alan Nurlana Əliyeva 1997-1999–cu illərdə Naxçıvan Dövlət Universitetində həmin istiqamət üzrə magistr təhsili alıb.  2001-ci ildən isə “Naxçıvan” Universitetinin Azərbyacan dili və ədəbiyyat kafedrasında  müəllim kimi fəaliyyət göstərir.  2013-cü ildə “Məhəmməd Tağı Sidqi və uşaq ədədbiyyatı” mövzusunda namizədlik dissertasiyası müdafiə edərək filologiya üzrə fəlsəfə doktoru alimlik dərəcəsi alıb. 2017-ci ildə isə “Naxçıvan” Universitetinin Elmi şurasının qərarı ilə universitetin dosenti seçilib. 2018-ci  ilin fevral ayından “Naxçıvan” Universitetinin Pedaqoji fakültəsinin dekanı vəzifəsində çalışır.

Univerisitetin Xarici dillər fakültəsinin dekanı Yasin Babazadə, Xarici dillər kafedrasının müdiri Anara Nəsirli və digərləri də çıxış edərək Nurlana Əliyevanı təbrik edib, ona bu məsuliyyətli vəzifəsində uğurlar arzulayıblar.

Naxçıvan Univerisietinin rektoru Nurlana Əliyeva göstərilən yüksək etimada görə Naxçıvan Muxtar Respublikası Ali Məclisinin Sədrinə minətdarlıq edib və bu etimadı doğruldacağına söz verib.

Qeyd edək ki, məlumat Nuhçıvan informasiya agentliyi tərəfindən yayılıb.