Xəbər lenti

Azərbaycanda icabri tibbi sığortanın tətbiqi 4 mərhələrə aparılmaqla bu il yekunlaşmalı idi. Hər mərhələ üçün seçilmiş regionlara 1 rüb vaxt ayrılmışdı.
2020-ci il yanvar ayının 1-dən başlayan birinci mərhələ Naxçıvan Muxtar Respublikası və Quba, Qusar, Xaçmaz, Şabran, Siyəzən, Xızı, Şamaxı, İsmayıllı, Ağsu, Qobustan, Balakən, Zaqatala, Qax, Şəki, Oğuz, Qəbələ, Göyçay, Ucar, Zərdab, Kürdəmir, Mingəçevir, Ağdaş, Yevlax rayonlarını əhatə edirdi. Naxçıvanda və yuxarıda adı çəkilən rayonlarda icbari tibbi sığortanın tətbiqi müddəti martın 31-də başa çatmalıydı və aprelin 1-dən icbari tibbi sığortanın başqa rayonlarda tətbiqinə başlanılmalı idi. Lakin, bu müddətdə işlər başa çatdırılmadığına görə, Azərbaycan Respublikası Nazirlər Kabinetinin “İcbari tibbi sığortanın ölkənin inzibati ərazi vahidləri üzrə tətbiqi ardıcıllığı”nın təsdiq edilməsi haqqında 504 nömrəli Qərarına dəyişiklik edilib. Dəyişilliyə əsasən icbari tibbi sığortanın ikinci mərhələdə tətbiqi aprel ayında deyil, iyul ayında həyata keçiriləcək.

İyul ayının 1-dən etibarən İkinci mərhələdə icbari tibbi sığortanın tətbiqi Gəncə, Göygöl, Goranboy, Daşkəsən, Samux, Naftalan, Şəmkir, Qazax, Ağstafa, Gədəbəy, Tovuz, Bərdə, Tərtər, Ağdam, Ağcabədi, Füzuli, Beyləqan, Xocavənd, Xocalı, Laçın, Kəlbəcərdə qeydiyyatda olan vətəndaşlar üçün nəzərdə tutulur.
Dünən Milli Məclisdə “Tibbi sığorta haqqında” qanuna dəyişiklik edilməklə Azərbaycanda icbari tibbi sığortanın mərhələli şəkildə tətbiqi müddəti 2022-ci ilədək uzadılıb. Bu isə o deməkdir ki, 2020-ci ildə tamamlanmaq şərtilə mərhələli şəkildə tətbiq olunmalı icbari tibbi sığorta qanundakı son dəyişiklikdən sonra, 2021-ci ildə tamamlanmaq şərti ilə mərhələli şəkildə tətbiq olunacaq.
Dəyişikliyi şərh edən iqtisadçı Qubad İbadoğlu bildirib ki, Bakı da daxil olmaqla digər ərazilərdə bu il icbari tibbi sığorta tətbiq olunmayacaq. Onun sözlərinə görə, icbari tibbi sığortanın əhəmiyyətinin artdığı hazırkı şəraitdə onun tətbiqinin gələn ilə ertələnməsi təəssüf doğurur: “Hesab edirəm ki, icbari tibbi sığortanın tətbiqinin başlıca səbəbi maliyyə təminatı ilə bağlıdır. Görünür, neftin ucuzlaşmasının ilk zərbəsi icbari tibbi sığortaya dəydi. Heç bir sosial proqramın ixtisarına yol verməyəcəyini bəyan edən hakimiyyət indidən icbari tibbi sığortaya ayrılan vəsaitin yarısını azaltdı. Bu məbləğ təxminən 500 milyon manata bərabərdir”.
AzPolitika.info



Ana səhifəyə qayıt        Baxış: 1 993          Tarix: 31-03-2020, 13:19      


Paylaş: