ABŞ öz zirehli hərbi texnikalarını Belarus sərhədinin on beş kilometrliyində yerləşən hərbi poliqona göndərib.
 
Ovqat.com xəbər verir ki, bunu Belarus Müdafiə naziri Viktor Xrenin dünən, sentyabrın 12-də mediaya açıqlamasında bildirib. 
 
Onun sözlərinə görə, Amerika zirehli texnikasını əsasən Litvanın Pabrad poliqonunda cəmləşdirib: “Söhbət bu yazda keçirilən manevrlərə bənzər tədbirdən gedir”,-Xrenin belə deyib. 
 
O, əlavə edib ki, Belarus tərəfi bu cür hərəkətlərdən narahat olmaya bilməz.  Nazirin fikrincə, ölkə sərhədləri boyunca NATO təyyarələrinin uçuşu müşahidə olunur. Xrenin onu da bildirib ki, Belarus hərbçiləri sərhəd yaxınlığında həyata keçirilən tədbirlərə adekvat reaksiya verirlər: “Raket və hava hücumlarına qarşı hərbi hissələrimiz döyüş növbətçiliyinə başlayıblar. Tank batalyonlarından biri tam döyüş hazırlığına gətirilib. Yaxın vaxtlarda o, Osipoviç poliqonuna göndəriləcək”.