Kənd təsərrüfatı naziri İnam Kərimov “Real TV”yə müsahibəsində deyib ki, 2022-ci ilin yanvar-fevral aylarında təqribən 100 min hektar sahədə taxıl əkinləri kəskin quraqlıq üzündən məhv olub. İqtisadçı alim, müxalif ADR Partiyasının sədri Qubad İbadoğlu yazır ki, nazir məhv olmuş taxıl əkininə görə büdcədən ayrılan subsidiyadan və 50 faizini dövlətin qarşıladığı aqrar sığortadan danışmayıb: “Dövlət büdcəsindən fermerlərə hər hektar taxıl əkininə görə 220 manat subsidiya verilir. 100 min hektar üçün subsidiya məbləği 22 milyon manat edir. Dövlətin bu qədər itkisinin hesabını kim verəcək?

Qarabağ, Şərqi Zəngəzur, Gəncə-Qazax və Şəki-Zaqatala iqtisadi rayonlarının ərazisində yetişdirilən taxılın hər tonunun satışından əldə edilən gəlirin 4 faizi, digər ərazilərdə isə 1,2-2,5 faizi qədər sığorta haqqı nəzərdə tutulur. Bu o deməkdir ki, riski yüksək olan ərazilərdə hər tondan 1000 manat gəlir əldə edildiyi halda onun 40 manatı sığortaya gedir. Sığorta hadisəsi baş verərsə, onda həmin gəlirin 90 faizini, yəni 900 manatı sığorta şirkəti fermerə ödəməlidir. Azərbaycanda quraqlığa görə sığorta ödənişi nəzərdə tutulmur, həmçinin məhv olmuş taxıl sahələrinin sığortalanmasına dair məlumatlar yoxdur. İstənilən halda100 min hektar taxıl əkinləri məhv olubsa, onun hansı fermerlərə məxsus olması və haralarda əkilməsinə dair məlumatlar da açıqlanmalıdır. Azərbaycanda hektardan orta məhsuldarlığın 32 sentner olduğunu nəzərə alanda quraqlığa görə məhv olmuş 100 min hektar sahədə taxıl əkinindən itkilərimiz 320 min ton olub, bu da buğdanın indiki qiyməti ilə 320 milyon manat deməkdir”.

Novator.az-ın məlumatına görə, Qubad İbadoğlu qeyd edir ki, aqrar, su və meliorasiya təsərrüfatı sahələrində idarəçilik yarıtmazdır: “Xüsusilə də taxıl qıtlığının olduğu indiki şəraitdə bunun üzərindən ötüb keçmək olmaz. Kənd Təsərrüfatı Nazirliyi dövlətə dəyən ziyanla bağlı əlavə bilgilər açıqlamalıdır”.