1992-ci ildə Sədərəkdə şəhid olan Bahadur Abbasovun qızı İnci xanım işə düzəlmək üçün Prezidentin Naxçıvandakı xüsusi nümayəndəsinin (bundan sonra “canişin”) qəbuluna gedir. “Canişin” təbii ki, pulsuz ziyarətçi olduğunu anladığından onu qəbul etmir. Ali Məclisdən şəhid qızını yönləndirirlər Əliheydər adlı birinin üstünə. 2 saatdır axtarıraram, bu Əliheydərin Ali Məclisdə nə işlə məşğul olduğunu tapa bilmirəm.

Nə isə, sözüm onda yox, Əliheydər adlı adam İnci xanımı qəbul edir və Səhiyyə Nazirliyinə göndərir. Yanında da nazirliyin kadr məsələləri üzrə səlahiyyətlisi Günəş Qədimova ilə danışır və  guya şəhid qızını ona tapşırır.

İnci xanım da etmir tənbəllik, gedir Günəş xanımın hüzuruna. Günəş xanım da qoymur heç şəhid qızı ağzını aça. Deyir ki, sənin atan çoxdan şəhid olub. Biz təzə şəhidlərin ailəsinə kömək edirik.

Qeyd edək ki, İnci xanım ailəlidir. İki uşağı var. Nə yoldaşı, nə də özü işləyir. Şəhid Bahadur Abbasovun 32 il əvvəl bizə miras qoyub getdiyi övladı indi Allah ümidinə yaşayır.

Naxçıvan canişinliyində “köhnəlmiş” şəhid hesab edilən Bahadur Abbasov kimdir?

Bahadur Abbasov: 1960-cı il 31 iyulda Naxçıvan şəhərində anadan olub. Azərbaycan Silahlı Qüvvələrinin əsgəri qismində I Qarabağ müharibəsinin bir sıra döyüşlərinə qatılıb. Azərbaycan Xalq Cəbhəsinin üzvü idi. 1992-ci il 24 may tarixində erməni tərəfi ilə əldə edilmiş razılıq əsasında meyidləri dəyişməyə gedərkən şəhid olub. Naxçıvan şəhərinin Şəhidlər Xiyabanında dəfn edilib.

***

İncinin incik xatirələri

Şəhid Bahadur Abbasovun qızı bu gün iş və ya sosial təminat almaq üçün Naxçıvan MR Əmək və Sosial Müdafiə Nazirliyinin qapısını döyüb. Bu nazirlikdən də ona “gedin evinizə, iş tapsaq, özümüz sizə zəng edərik” deyib yola salıblar.

İnci Abbasova atasını itirəndə 5 yaşında olub. O da kiçik bacısı Afaqla bərabər uşaq bağçasına gedirmiş. Mərhum Bahadur bəy dünyasını dəyişəndə Naxçıvan camaatı onun yadigarlarına pis baxmayıb. Hətta şəhidin qızlarının getdiyi uşaq bağçasına İncinin adını veriblər. Amma bu əzizləmə uzun sürməyib. Vasif Talıbov hakimiyyətə gələndən sonra İncinin adı uşaq bağçasından silinıb. O dövrü çətinliklə xatırlayan İnci xanımın yaddaşında bəzi silik xatirələr qalıb. 

Bununla belə, dediyinə görə, Vasif Talıbovun zamanında onlara “canişin” əfəndinin vaxtından daha çox diqqət göstərilirmiş: “Vasif Talıbovun vaxtında Naxçıvan Dövlət  Texniki kollecinin direktoru Asəf Rusenov  məni qəbul etdi. Məni həmin kollecdə işə düzəltdi. Daha sonra Naxçıvan TV-də studiya rejissoru oldum. Göydə Allah var, Vasif Talıbovun dövründə bizə daha çox hörmət qoyulurdu. İndiki hakimiyyət isə bizi get-gələ salmaqdan başqa heç bir işimizə yaramır”, - İnci belə deyir. 

Qeyd edək ki, İnci xanım Naxçıvan Dövlət Texniki kollecinin mühasibat uçotu və bank işi fakültəsini qırmızı diplomla bitirib. 

1992-ci ildə İnci və Afaqın getdiyi uşaq bağçasının müdirəsi olmuş Rəna Hüseynova da işlədiyi müəssisəyə İncinin adının verilməsini təsdiqləyir.

“Şəhidimiz Bahadur Abbasovun iki övladı, Afaq ve İnci mənim rəhbərlik etdiyim uşaq bağçasının fidanları olublar. İnci ailənin böyük övladıdır. Anaları ziyalı ve dəyərli Sürəyya xanımdır. Bahadur Abbasov şəhidlik zirvəsinə ucaldıqdan sonra mən müdirəsi olduğum bağcaya İnci adını verdim. Hər zaman diqqətim, qayğım onların üzərində olub. Bu gün İncinin qarşılaşdığı problem məni dərindən sarsıtdı. Ümid edirəm ki, tezliklə həllini tapacaq ve İnci balamız islə təmin olunacaq”, - İncinin   hərbi şəhərcikdə getdiyi uşaq bağçasının sabiq müdirəsi Rəna Hüseynova redaksiyamıza ünvanladığı məktubunda yazır.