Ötən gün Rusiya Nazirlər Kabinetinin “Aİ-92” və “Aİ-95” markalı benzinə ixrac qadağası qoyulacağı barədə məlumat vermiş və bunun çanağının bizim başımızda çatlayacağını bildirmişdik. Çünki Rusiyadan bu markalı benzini alanlardan biri də bizik və istər-istəməz Rusiya Nazirlər Kabinetinin məlum qərarı bizdən də yan keçməyəcəkdi.

Rusiya benzin ixracına qadağa qoymağa hazırlaşır, çanağı bizim başımızda çatlamasa yaxşıdır 
 
Ovqat.com-un bu proqnozunun reallaşması özünü çox gözlətmədi. Bu gün yayılan məlumata görə, artıq yanacaqdoldurma məntəqələrində benzinin qiyməti artırılıb. 
 
 “SOCAR Petroleum” QSC-nin mətbuat katibi Üzeyir Həbibbəyli Oxu.Az-a açıqlamasında bildirib ki, səhər saat 08:00 radələrindən bütün yanacaqdoldurma məntəqələrində “Aİ-95” premium markalı benzinin 1,45 AZN-dən satışına başlanılıb.  
 
O əlavə edib ki, qiymət artımının əsas səbəbi məhsulun idxal dəyərinin də artmasıdır:

“Aİ-95 markalı benzin Azərbaycanda istehsal olunmur. Onu xaricdən idxal edirik. Məhsulun alış qiymətinin artması onun ölkəmizdə satış qiymətinin də 5 qəpik artmasına səbəb olub”. 

 Qeyd edək ki, sonuncu dəfə “Aİ-95” premium markalı benzinin qiyməti 15 qəpik artaraq 1 manat 40 qəpik olmuşdu.
 
Ovqat.com-un təxminlərinə görə, Rusiyada “Aİ-92” və “Aİ-95” markalı benzinə ixrac qadağasının qoyulması ilə bahalaşma 5 qəpiklə qalmaya və digər markaların qiymətləri də analoji şəkildə arta bilər.