“Şimal-Cənub beynəlxalq nəqliyyat dəhlizi Cənubi Qafqazın inkişafında mühüm rol oynayır və regionun beynəlxalq bazarlara çıxışını təmin edir”.

Bunu “Report”a açıqlamasında tədqiqatçı, iqtisadçı Uluqbek Kamaletdinov deyib.

“Azərbaycandan keçərək İrana qədər uzanan Şimal-Cənub dəhlizi mühüm nəqliyyat arteriyasıdır. Buraya da Şərq-Qərb dəhlizi daxilidir. Şərq-Qərb dəhlizi Xəzər dənizini Gürcüstan vasitəsilə Qara dənizə, Türkiyə ərazisindən Aralıq dənizinə birləşdirir. Bu isə Mərkəzi Asiya ölkələrindən, Çindən Türkiyəyə və onun ərazisi ilə Avropaya yüklərin daşınması üçün imkanlar yaradır”, - o bildirib.

Ekspertin sözlərinə görə, hər iki dəhliz Cənubi Qafqazın inkişafında mühüm rol oynayır, regiona beynəlxalq bazarlara çıxış imkanı verir və iqtisadi inkişafı təşviq edir:

“Ümumiyyətlə, Cənubi Qafqaz regionunda bütün nəqliyyat kommunikasiyalarının, o cümlədən Şimal-Cənub və Şərq-Qərb dəhlizlərinin, həmçinin Zəngəzur dəhlizinin açılması bu regionda iqtisadi inkişafa, siyasi əlaqələrin möhkəmlənməsinə və sülhün bərqərar olmasına öz töhfəsini verəcək. Bu, qarşılıqlı faydalı ticarət və investisiyalar üçün yeni imkanlar açacaq, həmçinin Cənubi Qafqaz və Mərkəzi Asiya ölkələri arasında əməkdaşlığı gücləndirəcək”.