Xəbər lenti


İranda məhkumluq həyatı yaşayan Amerika vətəndaşı Maykl Vayt azad edilərək ölkəsinə göndərilib. 

Bu barədə məlumatı ABŞ prezidenti Donald Tramp da öz "Twitter" səhifəsində təsdiqləyib. 



O, Vaytın azadlığa çıxmasında göstərdiyi təlaşlara görə İsveçrəyə təşəkkür edib və bildirib ki, xarici ölkələrdə girov götürülmüş digər amerikalıların da azad edilməsi üçün əlindən gələni edəcək. 

Maykl Vaytın bu gün axşam saatlarında İsveçrənin Hərbi Hava Qüvvələrinə məxsus təyyarə ilə İranı tərk etdiyi deyilir. Eyni zamanda, ABŞ Dövlət Departamentinin İran üzrə Xüsusi İşçi Qrupunun rəhbəri Brayan Huk onu ölkəyə qayıdışda müşayiət etmək üçün həkim briqadası ilə İsveçrəyə doğru yola düşüb. 

Maykl Vaytın azadlığı ABŞ-da məhkumluq həyatı yaşayan iranlı alim Sirus Əsgərinin öz ölkəsinə qaytarılmasından 2 gün sonra baş tutsa da, hər iki tərəfin Xarici İşlər Nazirlikləri aralarında məhkum mübadiləsinin reallaşması faktını inkar edirlər. 

Digər tərəfdən, Maykl Vaytın İranı tərk etməsilə eyni vaxtda ABŞ-da məhkumluq həyatı yaşayan İran vətəndaşı Məcid Tahirinin də azadlığa buraxıldığına dair xəbərlər yayılıb. Bu məlumatı İran XİN-in rəhbəri Məhəmməd Cavad Zərif də təsdiqləyib. Bu xüsusda "Fox.news" telekanalı adını açıqlamadığı amerikalı rəsmiyə istinadən tərəflər arasında Maykl Vayt və Məcid Tahirinin qarşılıqlı azad edilməsi üçün məhkum mübadiləsinin baş tutduğu barədə məlumat yayıb. 

Hələlik ABŞ Məcid Tahirinin azadlığa buraxılmasını rəsmi qaydada təsdiqləməyib. 

Qeyd edək ki, ABŞ Hərbi Dəniz Qüvvələrinin veteranı olan Maykl Vayt 2 il öncə iranlı sevgilisini görmək üçün Məşhədə etdiyi səfər zamanı saxlanmışdı. "Dini lideri təhqir etmək" və "şəxsi fotoları yaymaq"da ittiham edilən Vayta qarşı 10 il həbs cəzası çıxarılmışdı.





Ana səhifəyə qayıt        Baxış: 2 072          Tarix: 5-06-2020, 11:18      


Paylaş: