Son 24 saatda Rusiyada koronavirusa yoluxma halı 10 mini keçib.
 
Ovqat.com-un Ümumdünya Səhiyyə Təşkilatına istinadən verdiyi məlumata görə, bu göstərici ilə Rusiya ABŞ-dan sonra ikinci yeri tutub. 




 

Ölüm sayında da Rusiya digər ölkələri xeyli təəccübləndirib, yaxşı mənada – 58 itki. Həqiqətən də artıq neçə müddətdir ikinci ən çox yoluxma faktı (10 min 633) yaşanmasına baxmayaraq, Rusiyada cəmi 58 nəfərin dünyasını dəyişməsi koronavirusa qarşı mübarizədə ciddi uğur kimi qiymətləndirilə bilər.

Gündəlik ölüm və yoluxma sayında isə ilk yer yenə ABŞ-a aiddir:
Ölüm – 729,
Yoluxma – 17 min 144.


 
ABŞ-da gün tamamlanmadığından yekun nəticələr də hələ müəyyənləşməyib. Ümumilikdə isə ABŞ-da indiyədək 68 min 173 nəfər koronavirusdan dünyasını dəyişib, 1 milyon 177 min 918 insan isə koronavirusa yoluxub. Onlardan 16 min 156-sının vəziyyəti ciddi və kritikdir.
 
Ölüm sayında ikiciliyi Böyük Britaniya yaxalayıb – 315. İngiltərə yoluxma sayında da 3 öncüldən biridir – 4 min 339. Koronavirusa indiyədək verdiyi qurban sayına görə, İngiltərə dünya ikincisi olan İtaliyaya yaxınlaşır – 28 min 446 ölüm. İtaliyada isə indiyədək 28 min 884 adam koronavirusa qurban gedib. Fərq – 438.


 
Ölüm siyahısında İngiltərəni İspaniya izləyir. İspaniyada indiyədək 25 min 264 nəfər koronavirusla ölüm-qalım savaşını uduzub. İndiyəqədərki korona-ölümlərində Fransa İspaniyaya yaxınlaşır. Onu dünya 4-cüsündən cəmi 369 ölüm faktı ayırır – 24 min 895.
 
Avropada koronavirusun ilk ocaqlarından olan İtaliya və İspaniyanın bugünkü göstəricilərinə nəzər salsaq, onların pik nöqtəni arxada qoyduqları anlaşılır. Bü gün İtaliyada koronavirusdan ölənlərin sayı 174, yoluxanların sayı 1389 olub. İspaniyada isə 164 ölüm, 1533 yoluxma. 


 
Türkiyədə də koronavirus epidemiyasının tədricən səngidiyi görünür. Ölkənin Səhiyyə naziri Fəxrəddin Qocanın Tvitter hesabında paylaşdığı məlumata görə, bu gün ilk dəfə Türkiyədə sağalanların ümumi sayı mövcud xəstə sayını keçib. Ümumi sağalanlar – 63 min 151, mövcud xəstələr - 59 min 497. 
 
Türkiyədə gündəlik ölüm və yoluxma hallarında da ciddi azalma var. Bu gün cəmi 61 nəfər koronavirus xəstəsinin dünyasını dəyişdiyi ölkədə 1670 yeni yoluxma halı aşkarlanıb.


 
Azərbaycanın gündəlik koronavirus statistikası xeyli ümidvericidir. Bu gün ölkəmizdə 38 yoluxma halı təsbit olunub. Ölən isə yoxdur.

30 nəfər isə sağalıb və evə buraxılıb.

Bu barədə Nazirlər Kabineti yanında Operativ Qərargahdan məlumat verilib.

Hazırkı dövrədək ölkəmizdə 1 932 nəfərin koronavirus infeksiyasına yoluxması faktı müəyyən edilmiş, onlardan 1441 nəfər müalicə olunaraq sağalmış, 25 nəfər vəfat edib, 466 nəfərin xüsusi rejimli xəstəxanalarda müalicəsi davam etdirilir.

Həmin şəxslərdən 19 nəfərin vəziyyəti ağır, 26 nəfərin vəziyyəti orta ağır qiymətləndirilir, digərlərinin səhhəti stabildir. 

Ötən müddət ərzində yeni yoluxma hallarının müəyyənləşdirilməsi ilə əlaqədar 157 932 test aparılıb.