Rusiyada ötən 24 saat ərzində 7 min 99 nəfərin koronavirusa yoxulduğu aşkarlanıb. Gün ərzində 101 nəfər isə dünyasını dəyişib.
 
Ovqat.com Ümumdünya Səhiyyə Təşkilatına istinadən xəbər verir ki, ölkədə indiyədək yoluxanların sayı 106 min 498, koronavirusdan ölənlərin sayı isə 1073 nəfərə yüksəlib.
 
Qeyd edək ki, ötən gün 5 min 841 yeni yoluxma, 105 ölüm faktı qeydə alınmışdı. Bu göstərici ilə Rusiya gündəlik yoluxma sayına görə ABŞ-dan (hələ ki, 15730) sonra 2-ci yerdədir. Onu 6 min 032 yoluxma faktı ilə İngiltərə təqib edir.
 
Hazırda 2 min 300 xəstənin vəziyyəti ağırdır. Yoluxanların 11 min 619-nun sağaldığı ölkədə 93 min 806 aktiv koronavirus daşıyıcısı var. 
 
Rusiyada indiyədək 3 milyon 490 min nəfərin koronavirus testindən keçirildiyi bildirilir.
 
Bu gün yayılan xəbərə görə, Rusiyanın Baş naziri Mixail Mişustin də son 24 saatda virusa yoluxduğu təsbit edilənlər arasındadır.