Naxçıvan MR Daxili İşlər Nazirliyində xidmət etmiş və adının açıqlanmasını istəməyən keçmiş zabitlərdən biri Ovqat.com-un ünvanına bir məktub göndərib. Məktubda Azərbaycan Polis Akademiyasının “xan”a işləyən bəzi məzunları barədə maraqlı məlumatlar öz əksini tapıb. 

Ovqat.com həmin məktubu olduğu kimi dərc edir.

“Salam, Heydər bəy, uzun zamandır ki, sizin yazılarınızı izləyirəm. Bir çox məqamlarda haqlısınız. Lakin haqsız olduğunuz məqamlar da var. Mən uzun müddət Naxçıvan DİN-də müxtəlif struktur qurumlarda çalışmışam və oradakı vəziyyətdən sizdən yaxşı məlumatım var. Zaman-zaman Polis Akademiyasının (PA) məzunlarına qarşı haqsızlıqlar olub. Lakin siz dediyiniz kimi, "Bakının casusları" damğasının vurulması absurddur. Habelə, PA məzunlarından Naxçıvandakı mövcud rejimə canla-başla xidmət edənlər və sizə qarşı zaman-zaman "söyüş" kompaniyaları aparanlar da olub. Onlardan bir neçəsi haqqında məlumat vermək istəyirəm. 

1. Mayis Nuriyev. Polis Akademiyasını bitirərək Naxçıvan MR-ə göndərilib. Mayis Nuriyev hər zaman Naxçıvana sadiq kadrlardan olub. Hazırda Naxçıvan Şəhər Polis İdarəsinin Cinayət axtarışı bölməsində xidmət edir. Əvvəllər isə həmin idarənin Narkotiklərlə mübarizə şöbəsində xidmət edib. Xidmət etdiyi dövrdə işinin gərəyi olaraq cibindən böyük məbləğdə pul xərcləyib və bunu dövlət üçün etdiyini vurğulayırdı. Həmçinin Naxçıvan DİN-in müavini Zahid Gözəlovun yaxın kadrlarındadır. Eləcə də, polis əməkdaşları arasında Zahid Gözəlovun təbliğatını aparır.

2. Nurlan Əliyev. Polis Akademiyasını bitirib. Naxçıvan DİN-in Narkotiklərlə Mübarizə Şöbəsinin Sabiq rəisi Asim Hüseynovun yaxın kadrı idi. Məhz buna görədir ki, akademiyanı bitirdikdən sonra Babək Rayon Polis İdarəsinin Narkotiklərlə Mübarizə Bölməsinə baş əməliyyat müvəkkili vəzifəsinə təyin olunmuşdur. Babək RPİ-də xidmət etdiyi dövrdə öz rəislərinin qanuni və qanunsuz göstərişlərini qeyd-şərtsiz icra etmişdir. Məhz buna görədir ki, cari ildə Naxçıvan Polis Məktəbinə müəllim olaraq təyin edilmişdir. 

3. Əli Qasımlı. Polis Akademiyasını bitirərək Naxçıvan DİN-ə təyinat alıb. Naxçıvan DİN-də ixtisas təcrübəsində olarkən, sosial şəbəkələrdə Naxçıvan rəhbərliyini təhqir edən bir şəxsi aşkar etdiyi üçün xüsusi rəğbət qazanmışdır. Elə buna görədir ki, İnsan Alverinə Qarşı Mübarizə Bölməsinə təyin edilmişdir. Cinayət Axtarışı İdarəsinin rəisi Qasım Həsənov ilə birgə zaman-zaman sizə qarşı təşkil edilmiş söyüş kompaniyasının başında durmuşdur. Belə ki, Əli Qasımlının təşkilatçılığı ilə bəzi polis əməkdaşları sizin yazılarınızın altından təhqirlər yazırdı. “SEDMOY”-da xidmət etdiyi dövrdə də, sosial şəbəkələrdə Naxçıvan muxalifətçilərinin və həmçinin etiraza meyilli şəxslərin neytrallaşdırılmasını həyata keçirmişdir. 44-günlük vətən müharibəsinin son günündə Sədərək rayonu istiqamətində Rusiyaya məxsus hərbi vertalyot vurulduqdan sonra Vasif Talıbovun adına sosial şəbəkələrdə sayt açıb, "biz vurmamışıq, helikopter donqili idi özü düşüb" yazan Naxçıvan şəhər sakinini aşkar edərək, həbs olunmasının əsas səbəbkarı Əli Qasımlı olmuşdur. 

4. Zeynal Babayev. Polis akademiyasını bitirdikdən sonra Naxçıvanda müxtəlif əməliyyat qurumlarında çalışmışdır. Naxçıvan rəhbərliyinə sədəqatli kadrlardandır. Həmçinin Naxçıvan Gömrük Komitəsinin sədr müavini Səbuhi Novruzovun yaxın qohumudur. Məhz sadəqətinə görə 2021-ci ildə növbədənkənar kapitan rütbəsinə layiq görüldü. Eşitdiyimə görə, Naxçıvan Ali Məclisinə gedən şikayətçilərin zərərsizləşdirilməsində xüsusi xidmətlər göstərdiyinə görə bir müddət əvvəl Naxçıvan DİN-in Cinayət Axtarışı İdarəsinin rəisi müavini vəzifəsinə təyin edilmişdir.