KTMT-nin beşinci ölkəsi olan Ermənistan, təəssüf ki, hazırkı rəhbərliyini simasında tam əks istiqamətdə hərəkət edir və Rusiya nöqteyi-nəzərindən Rusiya ilə Qərb arasında ekzistensial qarşıdurma kontekstində düşmən tərəfə keçir.

Musavat.com xarici agentliklərə istinadən xəbər verir ki, bunu bu gün, fevralın 24-də “Ermənistan yol ayrıcında: KTMT, NATO və ya qeyri-birlik statusu” mövzusunda keçirilən dəyirmi masada rusiyalı ekspert, Ali İqtisadiyyat Məktəbinin professoru Dmitri Suslov deyib.

Rusiyalı ekspertin fikrincə, KTMT ölkələri indi çox çətin vəziyyətdədir və bu uzun müddət belə də qalacaq, çünki hətta Ukraynada müharibə bitdikdən sonra Qərblə qarşıdurma bu və ya digər şəkildə davam edəcək.

"Və bütün bu müddət ərzində Qərb KTMT ölkələrinə, o cümlədən Ermənistana böyük təzyiq göstərəcək və Rusiyaya qarşı mübarizədə onlardan istifadə etməyə çalışacaq", - deyə Suslov hesab edir.

Suslovun sözlərinə görə, KTMT-nin dördüncü ölkəsi Belarus Qərbdən özünü təcrid etmək məcburiyyətində qalıb. Lakin Ermənistan, Rusiyaya görə düşmən tərəfə keçir. Üstəlik, bütün bunlar Rusiya ilə Qərb arasında ekzistensial qarşıdurma şəraitində baş verir.