Ankara BMT-nin Qüdsün statusuna dair qətnamə qəbul etməsindən sonra ABŞ prezidenti Donald Trampın bu şəhəri İsrailin paytaxtı kimi tanıması barədə qərarını ləğv edəcəyini gözləyir. APA-nın xəbərinə görə, bu barədə Türkiyə prezidenti Rəcəb Tayyip Ərdoğan bildirib.

 “Biz BMT Baş Assambleyasının Qüdslə əlaqədar əksəriyyət səs çoxluğu ilə  qəbul etdiyi qətnaməni böyük məmnuniyyətlə alqışlayırıq. BMT Baş Assambleyası tərəfindən qanunsuz olduğu isbat olunan Trampın bu uğursuz qərarının tez bir zamanda ləğv ediləcəyini gözləyirik. Öz adımdan və Türkiyə xalqının adından Fələstin və Qüdsə dəstək göstərən hər kəsə təşəkkür edirəm”, - deyə Ərdoğan “Twitter”-də qeyd edib.      

 Qeyd edək ki, BMT  Baş Assambleyası ABŞ-ın Qüdsü İsrailin paytaxtı kimi tanımasına dair qərarının qəbuledilməz olması barədə qətnamə qəbul edib.

 Səsvermənin nəticələrinə əsasən, 128 dövlət sənədin lehinə, 9 - əleyhinə səs verib, 35 dövlət isə bitərəf qalıb.