Qırğızıstan Prezidenti Sadır Japarov Tacikistan lideri Emoməli Rəhmonla telefon danışıqları aparıb və bu danışıqlar zamanı onlar iki ölkənin sərhədindəki vəziyyəti müzakirə ediblər.
 
Ovqat.com xəbər verir ki, bu barədə Tacikistan prezidentinin mətbuat xidməti məlumat yayıb.
 
"Danışıqlar zamanı dövlət başçıları Tacikistanın və Qırğızıstanın sərhəd rayonlarında vəziyyətin sabitləşməsinə dair əldə olunmuş razılaşmaların necə yerinə yetirilməsini müzakirə ediblər. Bununla yanaşı, atəşkəs rejiminə tam əməl olunması və qoşunların daimi mövqeyə qaytarılması məsələlərinə xüsusi diqqət ayrılıb", — deyə bəyanatda bildirilir.
 
Qeyd olunur ki, prezidentlər sərhədin delimitasiyası və demarkasiyası üzrə hökumətlərarası komissiyaların iclasının başlanması ilə bağlı da fikir mübadiləsi aparıblar.
 
Daha əvvəl bildirilmişdir ki, Qırğızıstan və Tacikistan mayın 1-də sərhədin demarkasiyası və delimitasiyası ilə bağlı növbəti danışıqlar aparacaqlar.