İsrail kəşfiyyatı “Mossad” Suriyada məxfi əməliyyat icra edərək İran generalını ələ keçirib. 
 
Ovqat.com xəbər verir ki, məlumatı İsrailin “The Times of İsrael” nəşri yayıb.
 
Nəşrin iddiasına görə, İranlı generalı yaxalamaq üçün planlaşdırılan gizli əməliyyat sentyabr ayında keçirilib.
 
Qeyd olunur ki, “Mossad”ın əməkdaşları Suriyada olan İran generalını qaçıraraq onu adı açıqlanmayan Afrika ölkəsinə aparıblar. 
 
İranlı general orada dindiriləndən sonra sərbəst buraxılıb. Əməliyyatın digər təfərrüatları və generalın adı açıqlanmır.
 
Bildirildiyinə görə, generalın oğurlanmasının səbəbi ondan 35 il əvvəl əsir düşən israilli təyyarəçi Ron Aradın yeri barədə məlumat almaq olub. Sözsüz ki, bu iddia yanıldıcı da ola bilər. Suriyada əməliyyatlara rəhbərlik edən İran generalının İsrail kəşfiyyatı üçün daha dəyərli məlumatlarının olması şübhə doğurmur və onun sərbəst buraxılması tələb edilən informasiyanı MOSSAD-a verdiyini göstərir.
 
Qeyd edək ki, Suriyada hərbi əməliyyatları SEPAH-ın Qüds gücü hərbi birləşməsi aparır. İslam İnqilabı keçikçilərinin çox sayda generalı bu əməliyyatlarda iştirak edir. MOSSAD-ın hansı generalını ələ keçirib, əməkdaşlığa cəlb etdikdən sonra buraxdığını müəyyənləşdirmək xeyli çətin olacaq.