Kabildə İslam din xadimləri və qəbilə ağsaqqallarının üç günlük toplantısının yekununda 11 bənddən ibarət qətnamə qəbul edilib. Qətnamədə “Taliban”a dəstək vəd edilib və beynəlxalq ictimaiyyət Əfqanıstanın “Taliban”ın rəhbərlik etdiyi Əfqanıstan hökumətini tanımağa çağırılıb.

“Khaama Press” xəbər verir ki, toplantıda yalnız kişilər iştirak edib və “Taliban” rəsmiləri qızların orta məktəbdə təhsil alması kimi həssas məsələlərin müzakirə oluna biləcəyini deyib.

“Taliban” rəsmiləri bildirib ki, bu görüş din xadimləri üçün müstəqil olaraq islamçı qrupun yoxsul ölkəni necə idarə etməli olduğuna dair tövsiyələr vermək üçün bir fürsətdir, lakin yekun qətnamə əsasən onların öz ideologiyalarının təkrarı idi.

Qətnamədə beyət yenilənərək “Taliban”ın ali lideri Molla Heybətullah Axundzadəyə sadiqlik, “Taliban”a sədaqət və şəriət qanunlarının qanunun əsası kimi mütləq qəbul edilməsi tələb olunur. O, həmçinin beynəlxalq ictimaiyyəti sanksiyaları ləğv etməyə, qarşılıqlı fəaliyyət göstərməyə və əfqan xalqının dondurulmuş aktivlərini açmağa çağırır.

Yekun qətnamədə qızların təhsilinə istinad edilməyib, lakin administrasiya müasir təhsilə xüsusi diqqət yetirməyə, o cümlədən ədalət və azlıqların hüquqlarına İslam qanunları ilə yanaşmağa çağırılıb.

Qətnamə eyni zamanda bir daha təsdiq edir ki, “Taliban” hökuməti və xalqı üsyanlara və korrupsiyaya qarşı müqavimət göstərməyə və mübarizə aparmağa borcludur.

“Taliban”ın dini ümumi yığıncağının iştirakçısı Mövlavi Mujib Rəhman Ənsari tədbirdən əvvəl demişdi ki, İslam Əmirliyi hakimiyyətinə qarşı üsyan edən hər kəsin başı kəsilməlidir.

AzPolitika.info