Azərbaycanın İsveçdəki diplomatik heyəti Xarici İşlər Nazirliyinin tələbi ilə geri çağırılıb. 
 
Xeber.de-nin diplomatik mənbələrdən əldə etdiyi məlumatda deyilir ki, Azərbaycanın İsveç Krallığındakı müvəqqəti işlər vəkili Günəş Rüstəmzadə, birinci katib Vaqif Seyidbəyov, konsulluq və humanitar məsələlər üzrə attaşe Elmar Məmmədov, maliyyə attaşesi Bəhruz Məmmədli artıq Bakıdadırlar. 
 
Diplomatların Bakıya çağırılması ilə bağlı ilkin versiyalardan biri, onların Azərbaycan Respublikasının Baş Prokurorluğunun Xarici İşlər Nazirliyi əməkdaşlarının vəzifə səlahiyyətlərindən sui-istifadə etmə, mənimsəmə, rüşvətalma faktlarına görə başlatdığı cinayət işi ilə bağlı olduğudur. 
 
Hazırda azərbaycanlı diplomatların fəaliyyət göstərdikləri binanın qapıları da bağlıdır. Telefon zəglərinə isə, cavab verilmir. 
 
Xatırladaq ki, Xarici İşlər Nazirliyi əməkdaşlarının vəzifə səlahiyyətlərindən sui-istifadə etmə, mənimsəmə, rüşvətalma faktlarına görə başlanmış cinayət işinə görə, Eldar Həsənov Azərbaycanın Serbiya Respublikasında, Monteneqroda, Bosniya və Hersoqovinadakı səfiri ikən şübhəli şəxs qismində avqustun 13-də DTX əməkdaşları tərəfindən saxlanılıb. Bundan bir neçə gün sonra o, səfir vəzifəsindən azad olunub.
 
Dövlət Təhlükəsizlik Xidmətinin (DTX) onunla bağlı yaydığı məlumatında deyilir ki, Xarici İşlər Nazirliyində maliyyə yoxlamaları ilə bağlı istintaq gedir və Eldar Həsənovun xeyli miqdarda büdcə vəsaitinin təyinatı üzrə istifadə edilməməsi və digər qanun pozuntularının törədilməsinə dair əsaslı şübhələr müəyyən edilib.
 
Ovqat.com-un əlavəsi 
 
Qeyd edək ki, bir müddət əvvəl sosial şəbəkədə Günəş Rüstəmzadənin sığınacaq üçün İsveç hökumətinə müraciət etdiyi barədə məlumat yayılmışdı. Odur ki, diplomatın geri çağırışa əməl edib-etməyəcəyi bəlli deyil.
 
Onu da əlavə edək ki, Günəş Rüstəmzadə Xalq şairi Süleyman Rüstəmin nəvəsidir.