Xatırlayırsınızsa bir neçə gün əvvəl Ucar rayonu Meliorasiya idarəsinin rəisi Həsən Qasımovun idarənin texnikasından şəxsi mənafeyi üçün istifadə etdiyinə dair bir vətəndaşın şikayət məktubunu dərc etmişdik. Şikayətçi öz iddialarını çəkib göndərdiyi video və fotolarla əsaslandırmışdı.
 
Ovqat.com xəbər verir ki, materialın dərcindən sonra şikayətçi Şirinov Raqif Ayaz oğlu rayon Meliorasiya İdarəsinin rəisinin oğlu və kürəkəni tərəfindən ağır təhqirlərə və ölüm təhdidlərinə məruz qalıb.
 
Bu barədə məlumatı şikayətçinin özü bizə yazdığı ikinci məktub bildirib. Onun iddiasına görə, təhqir və hədə zəngləri Ucar polisinin Yusif adlı zabiti tərəfindən də qeydə alınıb. Maraqlıdır ki, Həsən Qasımovun kürəkəni Zaur Səlimov şikayətçini söyüş yağmuruna tutarkən “sürətinə nəzarəti itirərək” Ucar rayon polis idarəsinin zabitini də ağır təhqirə “qonaq edib”. Şikayətçi Şirinov Rafiq məmur harınlığının bariz nümunəsi olan bu anların təkzibedilməz dəlili kimi telefon danışığının səs yazısını da məktuba əlavə edib. 
 
Prezidentin dəfələrlə barmaq silkələməsinə baxmayaraq, ölkəmizdə məmur özbaşınalığının nəinki qarşısının alınmadığını, hətta hər keçən gün daha da artdığını göstərən şikayət məktubunu və video-görüntünü olduğu kimi təqdim edirik.
 
***



Ucar rayonu H.Əliyev prospekti ev 136 sakini Şirinov Raqif Ayaz oğlu tərəfindən

ŞİKAYƏT
 
Bu şikayət ərizəmdə yazıb Sizə bildirirəm ki, Ucar rayon Meliorasiya İdarəsinin müdiri Həsən Qasımovun korrupsiya əməlləri barədə video və foto faktlarla şikayət etdikdən sonra məni ölümlə hədələtdirir və nalayiq söyüşlərlə məni təhqqir etdirir.

 Belə ki, Həsən Qasımovun barəsində video və fotofaktlarla şikayət etdikdən sonra 29 may 2021-ci il tarixdə onun kürəkəni "Azərişıq" ASC-nin yüksək vəzifəli əməkdaşı Səlimov Zaur Qurban oğlu (055) 301-66-06 nömrəli telefonu ilə mənə dəfələrlə zəng edib ölümlə hədələdi və nalayiq şəkildə söyüb təhqir etdi.

Mən bu barədə 102 xidmətinə zəng edib məlumat verdikdən sonra Ucar Rayon Polis Şöbəsinin Yusif adlı zabit əməkdaşı mənim izahatımı aldı. Həmin vaxt Zaur Səlimov mənə zəng edəndə Yusif adlı polis zabiti mənim telefonuma gələn zəngə cavab verdi. Zaur Səlimov məni və polis zabitini nalayiq söyüşlərlə təhqir etdi. 

Həmçinin Ucar rayon Meliorasiya İdarəsinin müdiri Həsən Qasımovun oğlu, Ucar “Melioraservis”də mühəndis işləyən Nicat Qasımov da mənə dəfələrlə zəng edib ölümlə hədələyib nalayiq söyüşlərlə təhqir etdi.


 
Ucar rayon Meliorasiya İdarəsinin müdiri Həsən Qasımov və onun harınlamış ailə üzvüləri dövlət qanunlarını saya salmırlar. Çünki onlar dövlətin ayrdığı vəsaiti təyinatı üzrə xərcləmədən talan edib cəzasız qaldıqları üçün azğınlaşıblar.

Mən 25 may 2021-ci il tarixdə video faktlarla Həsən Qasımovun korrupsiya əməllərini ifşa etdim. Belə ki, 25 may 2021-ci il tarixdə Ucar rayonu Qarabörk kəndində Həsən Qasımova məxsus böyük torpaq sahəsində yonca otu yığımı aparılan zaman həmin anları video lentə almışam. Həmin zaman Ucar rayon Meliorasiya İdarəsinə məxsus teknikaların və işçilərin orada işə cəlb edilməsi açıq-aydın görünür. Həsən Qasımov böyük ferma təsərrüfatı yaradıb iribuynuzlu heyvanlar saxlatdırır. Videoda görünən yonca otu idarəsinin texnikalarına yığılaraq həmin fermaya daşınır. Təqdim etdiyim fotoda İdarəyə məxsus üzərinə ot yığılmış 61 AC 262 nömrəli avtomobilin yanında dayanmış şəxs Meliorasiya İdarəsinin işçisi İsmayılov Fariz Fazil oğludur. O, Həsən Qasımovun şəxsi təsərüfatında işlərə cəlb edilib. Həsən Qasımov Ucar rayonu Qarabörk kəndindəki 10 hektar torpaq sahəsini zəbt edib yonca əkmişdir.   

Bu korrupsiya cinayətidir ki, Həsən Qasımov həyata keçirir. Ucar rayon Meliorasiya İdarəsinə məxsus traktora ot biçən, ot bağlayan, ot dırmıqlayan aqreqat qoşularaq Həsən Qasımovun təsərrüfatında işə cəlb edilir. Ot bağları isə idarəyə məxsus avtomaşınlara yığılaraq fermaya daşınır.

Mən bu korrupsiya cinayəti barədə Azərbaycan Respublikası Meliorasiya və Su Təsərrüfatı AS-nin sədri cənab Zaur Mikayılova və digər orqanlara şikayət ərizəsi ilə müraciət etmişəm. Həsən Qasımov uzun illərdi bu idarədə müdir vəzifəsində işləyir. Onun yarıtmaz fəaliyyəti nəticəsində rayon torpaqları şoranlaşıb məhv olur. Şirə kanalları lildən, kol-kosdan, qamışdan təmizlənmir deyə rayon torpaqları daha da şoranlaşıb məhv olur. Bütün işlər sənədlər üzərində saxtalaşdırılmaqla aparılır.

Mən hüquq mühafizə orqanlarından xahiş edirəm, şikayət ərizəmi mənim iştirakımı təmin etməklə yerində obyektiv araşdırıb korrupsiya əməlləri ilə məşğul olan məni ölümlə hədələyən və nalayiq sözlərlə söyüb təhqqir edən Həsən Qasımovun, onun ailə üzvüləri oğlu Nicat Qasımovun və kürəkəni Səlimov Zaur Qurban oğlunun barəsində tədbirlər görülməsinə tapşırıq verəsiniz. Qeyd edim ki, adı çəkilən hər üç nəfər vəzifəli şəxslərdir.
 
İddialarımı təsdiqləyən səs yazısını sizə təqdim edirəm.