“Ünvanlı dövlət sosial yardımı haqqında” qanuna əsasən, sosial yardım orta aylıq gəliri onlardan asılı olmayan səbəblərdən (ailə üzvlərinin əmək qabiliyyətsiz olması, ailənin əmək qabiliyyətli üzvünün birinci dərəcə əlilliyi olan şəxsə, 8 yaşına çatmamış uşağa və ya sağlamlıq imkanları məhdud 18 yaşınadək uşağa qulluq etməsi, 23 yaşınadək əyani təhsil alması, müvafiq icra hakimiyyəti orqanında dövlət orqanının və ya hüquqi şəxsin ləğv edilməsi və ya işçilərin sayı və ya ştatların ixtisar edilməsi ilə əlaqədar işsiz kimi qeydə alınması, vəfat etməsi, məhkəmə qərarı ilə itkin düşmüş və yaxud ölmüş hesab edilməsi, azadlıqdan məhrum edilməsi, ailə üzvünün olduğu yerin məlum olmaması) hər bir ailə üzvü üçün ehtiyac meyarının məcmusundan aşağı olan aztəminatlı ailələrə verilir.

Yardımın təyinatı üçün ehtiyac meyarının həddi 170 manatdır, 2022-ci il üçün 200 manat məbləğində təsdiqlənib.

Novator.az-ın məlumatına görə, prezidentin 29 dekabr 2021-ci il sərəncamına münasibət bildirən London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu yazır ki, 100 manatlıq yardım təxminən 50 min ailəni əhatə edəcək: “Halbuki 2020-ci ilin birinci yarısında ünvanlı dövlət sosial yardımı 84 min 600 aztəminatlı ailəni əhatə edirdi. Ölkədə qiymətlər, işsizlik və yoxsulluq artıb, amma yardım alan ailələrin sayını 1,7 dəfə azaldıblar”.

Qubad İbadoğlu həmçinin 2021-ci ildə Dövlət Sosial Müdafiə Fondunun gəlirlərinin əvvəlki ilə nisbətən 403 milyon manat artması barədə rəsmi hesabatı xatırladır və təklif verir: “403 milyon manat pensiyaçılara hədiyyə olunsun. Bərabər bölüşdürülsə, hər pensiyaçıya 336 manat düşür. 100 manata da razılaşmaq olar. Pensiyaçılar üçün 100 manat da böyük puldur”.