Türkiyə Prezidenti Rəcəb Tayyib Ərdoğanın Niderlandın Baş naziri Mark Rutte ilə telefon danışığı olub.

"Report" xəbər verir ki, tərəflər danışıq zamanı ölkələr arasındakı ikitərəfli əlaqələr, eləcə də NATO-nun yeni Baş katibinin müəyyənləşdirilməsi prosesi barədə fikir mübadiləsi aparıblar.

Ərdoğan NATO-nun Baş katibliyinə namizəd Rutteyə Türkiyənin alyansın yeni rəhbərindən gözləntilərini çatdırıb. Onun sözlərinə görə, yeni Baş katib terrorizm və digər çağırışlarla mübarizədə üzvlərin təhlükəsizliyi və maraqlarına ən yaxşı şəkildə xidmət etməli, alyansın birliyini gücləndirməsi və NATO-nun əsas roluna üstünlük verərək müəyyən edilmiş təcrübələrə riayət etmək üçün inandırıcı öhdəliklər götürməlidir:

"Ümid edirik yeni Baş katib NATO-nun əsas dəyərlərinə güclü bağlılıq göstərəcək".

Türkiyə Prezidenti bildirib ki, Avropa İttifaqının üzvü olmayan müttəfiqlərin maraqları da nəzərə alınmalıdır. Belə ki, Ankara bu prinsipləri nəzərə alaraq strateji mülahizələr və ədalət çərçivəsində qərar verəcək.