Rusiyanın dövlət neft şirkəti "Rosneft"in təmsilçisi şirkətin İraq Kürd Muxtariyyəti ilə imzaladığı anlaşmanın təfərrüatını açıqlayıb.SalamNews-un "Sputnik"ə istinadla verdiyi xəbərə görə, “Rosneft”in mətbuat katibi Mixail Leontyev Sankt-Peterburq Beynəlxalq İqtisadi Forumunda tərəflər arasında karbohidrogen ehtiyatların kəşfiyyatı və hasilatı sahəsində əməkdaşlığın genişləndirilməsinə dair bir sıra sazişlərin imzalandığını açıqlayıb.
“Rusiya prezidenti Vladimir Putinlə İraq Kürd Muxtariyyətinin rəhbəri Nəçirvan Bərzaninin görüşü ərəfəsində "Rosneft"lə muxtariyyət arasında hasilat, ticarət, daşınma və infrastruktur layihələrinin inkişafına dair sənədlər paketi imzalanıb.", - şirkət nümayəndəsi bildirib.
"Rosneft" katibi şirkət üçün gəlirli olan irihəcmli hasilat sənədi imzaladıqlarını, buna görə də “Rosneft”in İraq Kürd Muxtariyyətindən Türkiyəyə qədər çatacaq böyük neft kəmərinin 2/3-nə sahib olacağını bildirib və əlavə edib ki, bu, 20 illik uzunmüddətli sazişdir və strateji investisiya qoyuluşudur.
"Rosneft”in mətbuat katibliyindən verilən məlumata əsasən, yeni sazişlərlə şirkət 45 milyard barel neft və 5.66 trilyon kubmetr qaz ehtiyatı potensialı əldə etməklə dünya bazarının ən çox inkişaf perspektivi olan bölgələrdən birinə daxil olub.
