ABŞ prezidenti Donald Trampın keçmiş vəkili Maykl Koen memuarlarında Ağ Evin indiki rəhbərini ifşa edəcək faktları açıqlayıb.

Musavat.com xarici agentliklərə istinadən xəbər verir ki, bu barədə “The Washington Post” qəzetində xüsus yazı dərc olunub.

Qəzet Maykl Koenin bu ilin sentyabr ayının 8-də çıxacaq kitabının bir surətini əldə edib.

Kitabın bir bölümündə Maykl Koen Donald Trampın rusiyalı həmkarının mədəni və demokratik dövlətlər tərəfindən tənqidə məruz qalan idarəçilik üslubuna heyran qaldığı qeyd olunur. Belə ki, burada “ABŞ prezidentinin Rusiya Federasiyası dövlət başçısının bütün ölkəni tək bir əldə toplayaraq onu bir şirkət kimi idarə etməsini çox bəyəndiyi” yazılıb.

Bundan başqa, Maykl Koenin versiyasına görə, Donald Tramp 2016-cı ilə qədər Vladimir Putini dünyanın ən varlı adamı hesab edirmiş. ABŞ liderinin isə pulu çox sevdiyi heç kimə sirr deyil.

Ağ Ev, təbii ki, Maykl Koenin iddialarını təkzib edib. Prezidentin mətbuat katibi Keyli Makkenzi onu vəkillik lisenziyasından məhrum edilmiş, Konqresə yalan danışan cinayətkar adlandırıb.