Almaniya Belarusun iki tanınmış alman təhsil ocağının bu ölkədəki fəaliyyətinin tam qadağan edilməsinə dair qərarını kəskin pisləyib.

Minsk bu addımı Avropa İttifaqı Belarus üzərinə sərt iqtisadi sanksiyalar elan etdikdən sonra atıb. Almaniya Xarici İşlər Nazirliyinin sözçüsü iyunun 30-da deyib ki, Berlin Alman dil və mədəniyyətinin bütün dünyada təşviqi ilə məşğul olan Göte İnstitutunun və Alman Akademik Mübadilə Xidmətinin bu ölkədəki fəaliyyətinin dayandırılması barədə qərardan təəssüf hissi keçirir.

Sözçü bunu da deyib ki, Belarus bu addımı avtokrat Aleksandr Lukaşenkoya qarşı Avropa İttifaqının son sanksiyalarına cavab olaraq atıb. Lukaşenka rejimi 2020-ci ilin avqust prezident seçkisindən sonra müxalifətin kütləvi aksiyalarına, vətəndaş cəmiyyəti nümayəndələrinə və müstəqil jurnalistlərə divan tutduğuna görə beynəlxalq təzyiq altındadır. Avropa İttifaqı, Birləşmiş Ştatlar və bir sıra başqa ölkələr də bu seçkinin nəticələrini və Lukaşenkonun legitimliyini tanımadıqlarını bildiriblər.

Almaniya Xarici İşlər Nazirliyinin bəyanatında vurğulanır ki, Minskin bu qərarı Belarusun beynəlxalq aləmdəki təcridini daha da gücləndirəcək: “Bu qərarın zərəçəkənləri Belarus vətəndaşlarıdır. Onlar sosial-mədəni fəaliyyətlərini davam etdirməkdən məhrum edilirlər”. Bəyanatda qeyd olunur ki, sözü gedən iki Almaniya təsisatı onilliklər ərzində Almaniya, Avropa və Belarus arasında mədəniyyət və təhsil körpüsü rolunu oynayıb. Almaniya XİN eyni zamanda Belarus hakimiyyətinə, etirazçı hərəkatın legitim tələblərinə uyğun olaraq ciddi milli dialoqa daxil olmaq çağırışlarını təkrar edib.

Xatırladaq ki, ötən həftə Avropa İttifaqı Belarus iqtisadiyyatının Lukaşenko iqtidarına xarici valyuta gəliri gətirən sahələrinə sanksiyalar elan edib.

"AzPolitika.info"