Böyük Britaniya, Fransa və Kanada İsrail Qəzza zolağında döyüşləri dayandırmasa və anklavda mülki şəxslərə humanitar yardıma qoyulan məhdudiyyətləri aradan qaldırmasa, ona qarşı konkret tədbirlər görməyə hazır olduqlarını bildiriblər.

"Report" xəbər verir ki, bu barədə Yelisey sarayının mətbuat xidməti üç ölkə liderinin birgə bəyanatına istinadən xəbər verir.

Fransa Prezidenti Emmanuel Makron, Böyük Britaniyanın Baş naziri Kir Starmer və Kanadanın Baş naziri Mark Karni İsrailin Qəzzada hərbi əməliyyatları bərpa etməsinə qarşı sərt çıxış ediblər və İsrail hökumətini Fələstin anklavı ilə bağlı bəyanatlarına görə tənqid ediblər, həmçinin hazırkı bombardmanları “radikal hücuma cavab” hesab etdiklərini bildiriblər.

Qeyd edilib ki, onlar İsrailin Baş naziri Benyamin Netanyahu hökuməti Qəzza zolağında öz çirkin hərəkətlərini davam etdirdiyinə görə sakit dayanmayacaqlar.

"İsrail yeni hərbi hücuma son qoymasa və humanitar yardıma qoyulan məhdudiyyətləri aradan qaldırmasa, biz buna cavab olaraq konkret tədbirlər görəcəyik", - kommünikedə deyilir.

Liderlər, həmçinin İsrailin İordan çayının qərb sahilində yaşayış məntəqələrini genişləndirmək cəhdlərinə qarşı çıxış ediblər və belə tikintini qanunsuz adlandırıblar.

"İsrail qanunsuz məskunlaşma siyasətinə son qoymalıdır. Məqsədli sanksiyalar da daxil olmaqla, digər tədbirlər görməkdən çəkinməyəcəyik", - bəyanatda vurğulanır.

Makron, Starmer və Karni ABŞ, Qətər və Misirin Qəzzadakı münaqişənin həlli istiqamətində səylərini dəstəkləyərək atəşkəsə və HƏMAS-ı anklavda nəzarətdən əl çəkməyə çağırıblar. Onlar ümid edirlər ki, Nyu-Yorkda iyunda keçirilməsi gözlənilən konfrans bu məsələlərdə, eləcə də münaqişənin iki dövlət prinsipi əsasında həlli istiqamətində irəliləyiş əldə edəcək. Liderlər Fələstin dövlətinin tanınması istiqamətində digər ölkələrlə işləməyə hazır olduqlarını bildiriblər.