UEFA 2018-2019 mövsümündə Avropa Liqasının iştirakçıları arasında ümumilikdə 560 milyon avro bölüşdürəcək.

“Report”un məlumatına görə, ümumi ödənişlər iştirakçı klublar arasında 4 cür paylanılacaq:

25 faiz – İlkin ödənişlər (140 mln.)

30 faiz – İdman nəticələri əsasında təsbit edilmiş ödənişlər (168 mln.)

15 faiz – Komandaların son 10 illik zaman kəsiyindəki çıxışları əsasında hazırlanmış reytinqə əsasən bölünəcək (84 mln.)

30 faiz – Marketinq payına uyğun bölünəcək (168 mln.)

140 milyon avroluq ilkin ödənişlərdən qrup mərhələsindəki 48 iştirakçı komandanın hər biri 2,62 milyon avro qazanacaq.

168 milyon avroluq təsbit edilmiş ödənişlərdən klub qrup mərhələsində hər qələbəsinə 570 min avro, heç-heçəyə 190 min avro alacaq. İstifadə olunmamış vəsaitlər (hər heç-heçə üçün 190 min avro) toplanacaq və qrup mərhələsində çıxış etmiş klublar arasında qələbə sayına uyğun bölünəcək.

Qrupun hər bir qalibi 1 milyon avro, ikinci yerin sahibi isə 500 min avro əldə edəcək.

Pley-off mərhələsinə çıxacaq klublar üçün ödənişlər isə belə müəyyənləşib:

1/16 finalda iştirak üçün – hərəyə 500 min

1/8 finalda iştirak üçün – hərəyə 1,1 mln.

1/4 finalda iştirak üçün – hərəyə 1,5 mln.

Yarımfinalda iştirak üçün – hərəyə 2,4 mln.

Finalda iştirak üçün – hərəyə 4,5 mln.

Qalib – əlavə 4 mln.

UEFA Super Kubokuna vəsiqə qazanan klublar hərəyə 3,5 milyon avro alacaqlar. Qalib isə əlavə 1 milyon avro qazanacaq.

10 illik dövrdəki çıxışlara uyğun tərtib olunmuş reytinq əsasında 84 milyon avroluq ödənişlərdən bir payın məbləği 71430 avrodur. Bu məbləğ ən aşağı reytinqli kluba çatacaq. 48 iştirakçı arasında ən reytinqlisi isə 48 pay (3,42 milyon avro) əldə edəcək.

168 milyon avroluq marketinq payı qrup mərhələsindən etibarən Avropa Liqası iştirakçılarının təqdim etdikləri hər bir konkret televiziya bazarının çəkisinə uyğun bölünəcək. Sonra isə bu məbləğ müvafiq milli assosiasiyanı təmsil edən klublara paylanılacaq.

Marketinq payından ödənişlər bütün müqavilələr bağlanıldıqdan sonra və turnir bitəndən sonra ödəniləcək. Çünki hər bir klubun konkret mükafat məbləği 5 amildən asılıdır:

– Marketinq payının real məbləği

– 2018-2019 mövsümündə Avropa Liqası iştirakçılarının tərkibi

– Avropa Liqası iştirakçıları arasında hər bir milli assosiasiyadan klub sayı

– Avropa Liqası iştirakçısının son ölkə çempionatında tutduğu yer

– Hər bir klubun Avropa Liqasındakı nəticəsi.

Həmrəylik ödənişlərinə gəldikdə, yeni bölgü sisteminə əsasən, Çempionlar Liqası və ya Avropa Liqasının təsnifat mərhələsində çıxış edən klublara ümumi gəlirdən 3 faiz, üstəgəl, Çempionlar Liqası klublarından 10 milyon avro ödəniləcək. Ümumilikdə bu məbləğ 107,5 milyon avro təşkil edəcək.

Avropa Liqasının Çempionlar Yolu və Liqa Yolu üçün bölgü belə müəyyənləşdirilib:

– İlkin mərhələdə iştirak etdikləri üçün – 220 min

– Birinci təsnifat mərhələsində iştirak etdikləri üçün – 240 min

– İkinci təsnifat mərhələsində iştirak etdikləri üçün – 260 min

– Üçüncü təsnifat mərhələsində iştirak etdikləri üçün – 280 min (Yalnız Çempionlar Yolu üçün. Çünki bu mərhələdə mübarizəni dayandırmış Liqa Yolundan olan klublar Avropa Liqasının qrup mərhələsinə avtomatik vəsiqə qazanır və sonradan bu turnirdən mükafat qazanırlar)

Pley-off raundunda iştirak etdikləri üçün – 300 min avro (Yalnız mübarizəni dayandıran klublar üçün). Pley-off raundunun qalibləri üçün həmrəylik ödənişləri nəzərdə tutulmayıb. Lakin bu zaman onlar daha erkən mərhələlərdən mübarizəyə başlayıblarsa, təsnifat mərhələlərində iştirak etdikləri üçün ödənişlər alacaqlar.

Avrokubokların qrup mərhələsinə vəsiqə qazanmamış klublara ödənişlər milli assosiasiyalar və ya liqalar vasitəsilə çatdırılacaq. Bu komandalar ümumi gəlirin 4 faizini alacaqlar. Həmin məbləğin ümumilikdə 130 milyon avro olacağı planlaşdırılır.

Qeyd edək ki, ÇL-də Azərbaycanı Premyer Liqanın qalibi “Qarabağ” təmsil edəcək. “Qəbələ”, “Neftçi” və “Keşlə” isə Avropa Liqasına vəsiqə qazanıblar.