Xəbər lenti

 

Argentina millisinin və İspaniya təmsilçisi “Barselona”nın futbolçusu Lionel Messi indiyə qədər qarşılaşdığı ən güclü komandanın adını açıqlayıb.

“Report” xəbər verir ki, argentinalı hücumçu bu barədə “RAC 1”ə müsahibəsində deyib. 32 yaşlı forvard həmin kollektivin 2010-cu il dünya çempionatında üz-üzə gəldikləri İspaniya yığması olduğunu deyib: “Bu komanda məni heyran etdi. Ən yaxşı müdafiəsi olan komandaya gəlincə, bilmirəm. İndiyə qədər dəfələrlə güclü rəqiblərə qarşı oynamışıq. Xüsusən də futbolçularının fiziki güclərinə görə İngiltərə klublarını qeyd edərdim. Son illər futbol daha çox müdafiə yönümlü və taktiki olub. Hazırda müdafiədə sərt oynayan çox rəqib var”.

Messi bəzilərinin onu “Allah” adlandırmalarına da münasibət bildirib: “Bu, xoşuma gəlmir. Bunu pis mənada deməsələr də, şişirdirlər. Xüsusən də uşaqlarım bütün bunları eşidir və əzbərləyirlər. Övladlarım məni “Leo Messi” və ya “Vamos Leo Messi” adlandırırlar”.

Təcrübəli hücumçu futbolda videotəkrar sisteminin tərəfdarı olduğunu bildirib. O, yayda “Atletiko”dan “Barselona”ya keçən Antuan Qrizmannla aralarında heç bir problemin olmadığını, onun transferini ilk gündən dəstəklədiyini vurğulayıb.

Qeyd edək ki, “Barselona”nın yetirməsi olan Lionel Messi əsas komandada 2004-cü il oktyabrın 16-da debüt edib və hazırda klubun ən titullu futbolçusudur. O, 10 dəfə İspaniya və 3 dəfə klublararası dünya çempionu olub. Forvard 6 dəfə ölkə kubokunun, 8 dəfə ölkə Super Kubokunun, 4 dəfə Çempionlar Liqasının, 3 dəfə UEFA Super Kubokunun qalibi adını qazanıb. Argentinalı futbolçu 6 dəfə “Qızıl top”a və 6 dəfə “Qızıl buts”a layiq görülüb.




Ana səhifəyə qayıt        Baxış: 419          Tarix: 9-10-2019, 14:09      

Xəbəri paylaş


Paylaş:   

Prizma