Avropa İttifaqında əsas vəzifələri Ursula Fon der Lyayen, Antoniu Koşta və Kaya Kallas tutacaq. İndi onların namizədliyi Avropa Parlamenti tərəfindən təsdiqlənməlidir.

"Report" xəbər verir ki, Avropa İttifaqı ölkələrinin liderləri iyunun 27-də axşam Brüsseldə keçirilən sammitdə blokun əsas institutlarının yeni rəhbərlərinə səs veriblər.

Səsvermə nəticəsində Ursula Fon der Lyayen Avropa Komissiyasının Prezidenti olaraq qalır, Avropa İttifaqı Şurasına Portuqaliyanın keçmiş baş naziri Antoniu Koşta, Aİ-nin xarici siyasət xidmətinə isə Estoniyanın Baş naziri Kaya Kallas başçılıq edəcək.

Onların namizədliyini təsdiq etmək üçün gücləndirilmiş kvalifikasiyalı çoxluğun dəstəyi lazım idi. Buna iki şərtin eyni vaxtda yerinə yetirilməsi ilə nail olunur: Avropa İttifaqının əhalisinin ən azı 65 %-ni təmsil edən 27 üzv ölkədən azı 20-si (72 %) təklifə səs verməlidir.

Ukraynadakı müharibə, Aİ-nin müdafiə və təhlükəsizlik və Yaxın Şərqdəki münaqişə mövzularının müzakirəsindən sonra liderlərin seçilməsi kimi incə mövzu gündəliyin ən aşağısına daşındığı üçün intriqa sammitin ilk gününün sonunadək davam edib.

İndi gələcək liderlər daha bir maneəni dəf etməlidirlər: yeni Avropa Parlamenti onların namizədliklərini və yeni Avropa komissarlarını təsdiq etməlidir. 720 yerlik yeni parlamentdə 190 yerə sahib olan Aİ-nin ən böyük siyasi bloku olan Avropa Xalq Partiyasının əksər deputatlarının Fon der Lyayeni dəstəkləyəcəyi gözlənilir, lakin onun səs çoxluğu əldə etmək üçün digər partiyaların dəstəyinə və Avropa parlamentarilərinin yarısından bir qədər çoxunun səsinə ehtiyacı olacaq.