Vladimir Putin sistemli şəkildə COVİD-19 testindən keçirilir və indiyədək onda koronavirusa yoluxma halı təsbit olunmayıb.
Ovqat.com xəbər verir ki, bu açıqlama dünən gecə Kreml tərəfindən verilib.


Açıqlama zərurəti Rusiya prezidentinin martın 24-də Moskva vilayətinin Kommunarka qəsəbəsində yerləşən bir tibb mərkəzində baş həkim Denis Protsenko ilə görüşməsindən doğub. 

“RİA Novosti”nin məlumatına görə, Denis Protsenkoda koronavirus aşkarlanıb. Bu da istər-istəməz diqqətləri bir həftə əvvəl baş həkimlə görüşən Putinə yönəldib.

Kreml nə qədər Putinin koronavirusa yoluxma ehtimalını rədd etsə də, Rusiya ictimaiyyətindəki narahatlığa son qoyulmayıb. Nədən ki, post-sovet məkanında rəsmi xəbərlər ictimaiyyəti məlumatlandırmağa deyil, əskinə həqiqəti gizlətməyə xidmət edib. 

Xatırladaq ki, dünən Rusiyada koronavirusa yoluxma hallarında rekord artım yaşanıb. ÜST-ün məlumatına görə, dünən Rusiyada 501 yoluxma faktı qeydə alınıb. Ümumilikdə 2337 rusiyalının koronavirusa yoluxduğu, onlardan 17-nin öldüyü rəsmən etiraf olunub.